Oblysqa ınvestısıa tartý jáne búgingi jaǵdaıdy talqylaý maqsatynda uıymdastyrylǵan basqosýǵa aımaqtyq keńestiń músheleri, jumys istep turǵan jáne áleýetti ınvestorlar men óńirdiń iri kásipkerleri qatysty.
Óńirge ınvestısıa jumyldyrý boıynsha jyl basynan beri sheteldik ınvestorlarmen 40-tan asa iskerlik kezdesý uıymdastyrylǵanyn aıtqan aımaq basshysy jyl basynan beri oblysqa 229,9 mlrd. teńge bolatyn ınvestısıa tartylǵanyn jetkizdi.
– Ótken jyldyń tıisti kezeńimen salystyrǵanda ınvestısıa tartý kórsetkishi 131,5 paıyzǵa artqan. Bul respýblıkadaǵy úlesiniń 5,7 paıyzyn qurap otyr. Bıyl Birikken Arab Ámirligimen medısınalyq buıymdar men preparattar shyǵarý zaýytyn salý, Reseımen birge Evro-5 talabyna saı janarmaı shyǵaratyn munaı óńdeý zaýytyn salý kelisimderi túzildi. Ońtústik óńiri munymen qosa Qytaımen birge bıetanol, fosfor tyńaıytqyshtary men qýaty 200 MVt kún elektr stansıasyn salmaq, – dedi Janseıit Túımebaev.
Sonymen birge aımaq basshysy óńirde ınvestorlar úshin barlyq jaǵdaı jasalǵanyn atap ótti. Budan basqa, ol barlyq azamattardy birlese jumys isteýge shaqyryp, ınvestısıa tartýǵa kedergi jasaıtyn laýazymdy tulǵalardyń jaýapkershiligin qaraýdy aıtty.
Búginde oblysta aımaqtyq damý ınstıtýttarynyń tıimdi júıesi jasalǵan, olardyń negizgi tapsyrmasy óńirge ınvestısıa tartý jáne ınvestorlarǵa bir tereze qaǵıdasy boıynsha qolaıly jaǵdaı jasaý. Instıtýttar kásipkerlerge keńes beredi jáne qarjylyq pen ınfraqurylymdyq kómek kórsetedi.
Sonymen qatar, óńirde 11 ındýstrıaldy aımaq pen «Ońtústik» arnaıy ekonomıkalyq aımaq bar. Sońǵysynyń tıimdi erekshe rejımi men tolyq tartylǵan ınfraqurylymy bar. 2017 jyly osy «Ońtústik» arnaıy ekonomıkalyq aımaǵynda quny 3,4 mıllıard teńge bolatyn 4 joba júzege asyrylady dep kútilýde. Al ındýstrıaldy aımaqtarda 8,6 mıllıard teńgeniń 13 jobasy iske qosylmaq.
Búgingi tańda ındýstrıalandyrý baǵdarlamasy boıynsha júzege asqan ár 5 joba Ońtústik Qazaqstan oblysyna tıesili. Baǵdarlama aıasynda 8 jyl ishinde oblys aýmaǵynda jalpy quny 208,3 mıllıard teńge bolatyn 162 joba iske qosyldy. Onyń ishinde ınvestısıa kólemi 1,2 trıllıon teńge bolatyn 88 joba júzege asyryldy.
OQO ákiminiń baspasóz qyzmeti
