بۇگىن وڭتۇستىك قازاقستان وبلىسىنىڭ اكىمى ج.تۇيمەبايەۆتىڭ توراعالىعىمەن وڭىردەگى ينۆەستيسيالىق جاعدايدى جاقسارتۋ مەن ينۆەستورلاردى تارتۋ بويىنشا ايماقتىق كەڭەستىڭ وتىرىسى ءوتتى.



وبلىسقا ينۆەستيسيا تارتۋ جانە بۇگىنگى جاعدايدى تالقىلاۋ ماقساتىندا ۇيىمداستىرىلعان باسقوسۋعا ايماقتىق كەڭەستىڭ مۇشەلەرى، جۇمىس ىستەپ تۇرعان جانە الەۋەتتى ينۆەستورلار مەن ءوڭىردىڭ ءىرى كاسىپكەرلەرى قاتىستى.

وڭىرگە ينۆەستيسيا جۇمىلدىرۋ بويىنشا جىل باسىنان بەرى شەتەلدىك ينۆەستورلارمەن 40-تان اسا ىسكەرلىك كەزدەسۋ ۇيىمداستىرىلعانىن ايتقان ايماق باسشىسى جىل باسىنان بەرى وبلىسقا 229،9 ملرد. تەڭگە بولاتىن ينۆەستيسيا تارتىلعانىن جەتكىزدى.

– وتكەن جىلدىڭ ءتيىستى كەزەڭىمەن سالىستىرعاندا ينۆەستيسيا تارتۋ كورسەتكىشى 131،5 پايىزعا ارتقان. بۇل رەسپۋبليكاداعى ۇلەسىنىڭ 5،7 پايىزىن قۇراپ وتىر.  بيىل  بىرىككەن اراب امىرلىگىمەن مەديسينالىق بۇيىمدار مەن پرەپاراتتار شىعارۋ زاۋىتىن سالۋ، رەسەيمەن بىرگە ەۆرو-5 تالابىنا ساي جانارماي شىعاراتىن مۇناي وڭدەۋ زاۋىتىن سالۋ كەلىسىمدەرى ءتۇزىلدى. وڭتۇستىك ءوڭىرى مۇنىمەن قوسا قىتايمەن بىرگە بيەتانول، فوسفور تىڭايىتقىشتارى مەن قۋاتى 200 مۆت كۇن ەلەكتر ستانسياسىن سالماق، – دەدى  جانسەيىت تۇيمەبايەۆ.

سونىمەن بىرگە ايماق باسشىسى وڭىردە ينۆەستورلار ءۇشىن بارلىق جاعداي جاسالعانىن اتاپ ءوتتى. بۇدان باسقا، ول بارلىق ازاماتتاردى بىرلەسە جۇمىس ىستەۋگە شاقىرىپ، ينۆەستيسيا تارتۋعا كەدەرگى جاسايتىن لاۋازىمدى تۇلعالاردىڭ جاۋاپكەرشىلىگىن قاراۋدى ايتتى.

بۇگىندە وبلىستا ايماقتىق دامۋ ينستيتۋتتارىنىڭ ءتيىمدى جۇيەسى جاسالعان، ولاردىڭ نەگىزگى تاپسىرماسى وڭىرگە ينۆەستيسيا تارتۋ جانە ينۆەستورلارعا ءبىر تەرەزە قاعيداسى بويىنشا قولايلى جاعداي جاساۋ. ينستيتۋتتار كاسىپكەرلەرگە كەڭەس بەرەدى جانە قارجىلىق پەن ينفراقۇرىلىمدىق كومەك كورسەتەدى.

سونىمەن قاتار،  وڭىردە 11 يندۋستريالدى ايماق پەن «وڭتۇستىك» ارنايى ەكونوميكالىق ايماق بار. سوڭعىسىنىڭ ءتيىمدى ەرەكشە رەجيمى مەن تولىق تارتىلعان ينفراقۇرىلىمى بار. 2017 جىلى وسى «وڭتۇستىك» ارنايى ەكونوميكالىق ايماعىندا قۇنى 3،4 ميلليارد تەڭگە بولاتىن 4 جوبا جۇزەگە اسىرىلادى دەپ كۇتىلۋدە. ال يندۋستريالدى ايماقتاردا 8،6 ميلليارد تەڭگەنىڭ 13 جوباسى ىسكە قوسىلماق.

بۇگىنگى تاڭدا يندۋستريالاندىرۋ باعدارلاماسى بويىنشا جۇزەگە اسقان ءار 5 جوبا وڭتۇستىك قازاقستان وبلىسىنا تيەسىلى. باعدارلاما اياسىندا 8 جىل ىشىندە وبلىس اۋماعىندا جالپى قۇنى 208،3 ميلليارد تەڭگە بولاتىن 162 جوبا ىسكە قوسىلدى. ونىڭ ىشىندە ينۆەستيسيا كولەمى 1،2 تريلليون تەڭگە بولاتىن 88 جوبا جۇزەگە اسىرىلدى.

 وقو اكىمىنىڭ باسپا ءسوز قىزمەتى