Sesıa tóraǵalyq jasaǵan D.Ábish qaralatyn máselelerdi habarlap, bólinýge baılanysty atqarylǵan jumystar týraly oblys ákiminiń birinshi orynbasary Á.Óserbaev baıandama jasady.
– 2018 jyldyń 16 aqpanynda Saryaǵash jáne Maqtaaral aýdandarynyń ókildi jáne atqarýshy organdarynyń aýdan aýmaǵyn bólý jolymen aýdandar qurý, olarǵa ataý berý, ákimshilik ortalyqtary men shekaralaryn belgileý týraly birlesken sheshimderi qabyldandy. Osyǵan oraı, Maqtaaral aýdanyn úsh aýdanǵa ıaǵnı, Maqtaaral, Asyqata, Jetisaı, Saryaǵash aýdanyn eki aýdanǵa ıaǵnı, Saryaǵash, Keles dep bólip, burynǵy aýdan ortalyqtaryn qaıta qalpyna keltirý usynylady, – dedi.
Sesıada sóz alǵan oblystyq máslıhat depýtaty Sádý Bekenov Maqtaaral aýdany 1997 jyly 24 sáýirde burynǵy úsh aýdandy biriktirý nátıjesinde qurylǵanyn aıtyp, tarıhı usynysty Myrzashól jurty ystyq yqylaspen qabyldap otyrǵanyn jetkizdi.
– Maqtaaral aýdany oblystaǵy halqy tyǵyz shoǵyrlanǵan jáne demografıalyq ósimi jaǵynan joǵary aýdan sanalady. Mundaǵy jalpy halyq sany 304 684 adamdy qurap otyr. Aýdan 182 eldi mekennen, 1 qala, 3 kent jáne 20 aýyldyq okrýginen quralǵan. Sondyqtan Maqtaaral aýdanyn úshke bólý sheshimi Elbasydan qoldaý taýyp, aldaǵy ýaqytta atalǵan óńirlerdiń áleýmettik ekonomıkalyq hal-aqýaly jaqsara túsetini sózsiz. Jyl kóleminde jumys tobyn quryp, barlyq qajetti sharalardy júrgizgen oblys ákimi J. Túımebaevqa rızalyǵymyzdy bildiremiz, – dedi Sádý Kettebaıuly.
Al, Saryaǵash aýdany 1997 jyly burynǵy Saryaǵash jáne Keles aýdandaryn biriktirý jolymen qurylǵan. Atalǵan aýdanda búginde 326 915 halyq turady. Aýdan aýmaǵy 762203 gektar, 154 eldi mekeni, 1 qala, 1 kent jáne 23 aýyldyq okrýginen quralǵan.
– Búgingi usynysty tarıhı sát dep baǵalaýǵa bolady. Atalǵan aýdandarda qazirgi tańda 630 myńnan astam halyq turyp jatyr. Bul elimizdegi ózge oblystardyń halyqymen salystyrǵanda edáýir kóp sanalady. Endi usynysymyz Elbasy tarapynan tolyq qoldaý taýyp jatsa, eki aýdandaǵy halyqqa memlekettik qyzmet kórsetý júktemesi azaıyp, ákimshilik aýmaqtaǵy barlyq baǵyttaǵy jumystardyń sapasyn kóterýge óz septigin tıgizedi dep esepteımin, – dedi Janseıit Qanseıituly.
Atalǵan eki aýdanda halyqtyń tyǵyz ornalasý sebebinen kásipkerlikti, aýyl sharýashylyǵyn óz deńgeıinde damytý úshin memleket tarapynan beriletin qoldaýlardy halyqqa jetkizý, tolyq jáne sapaly qamtý máseleleri áli de bar. Densaýlyq saqtaý salasynda, atap aıtqanda, der kezinde medısınalyq kómek kórsetý, shalǵaıda ornalasqan eldi meken turǵyndaryn aýdan ortalyǵyndaǵy aýrýhanalar men perzenthanalarǵa jedel jetkizý máselesi de tolyq qamtýdy qajet etedi.
Jańa qurylatyn aýdandarǵa ataý berý máselesi respýblıkalyq onomastıka komısıasynyń qaraýyna usynylmaq. Maqtaaral aýdanynyń ákimshilik ortalyǵy Myrzakent kenti, Asyqata aýdanynyń ákimshilik ortalyǵy Asyqata kenti, Jetisaı aýdanynyń ákimshilik ortalyǵy Jetisaı qalasy bolyp belgilenip otyr.
Al Saryaǵash aýdanynyń ákimshilik ortalyǵy – Saryraǵash qalasy, Keles aýdanynyń ákimshilik ortalyǵy retinde Abaı aýyly belgilendi.
OQO ákiminiń baspasóz qyzmeti
https://dalanews.kz/33474
