وڭتۇستىك قازاقستاندا وبلىسىندا حالقى ەڭ تىعىز ورنالاسقان ماقتاارال جانە سارىاعاش اۋداندارىن ءبولۋ تۋرالى ماسەلە سوڭعى جىلدارى ءجيى قوزعالىپ كەلدى. ال بۇگىن التىنشى شاقىرىلىمىنداعى وبلىستىق ءماسليحاتتىڭ حح سەسسياسىندا اتالعان ۇسىنىس كۇن تارتىبىندە قارالىپ، دەپۋتاتتاردان قىزۋ قولداۋ تاپتى. سەسسيانى قورىتىندىلاعان وبلىس اكىمى جانسەيىت تۇيمەبايەۆ حالىق كۇتكەن تاريحي شەشىمدى نەگىزدەۋ ءۇشىن ءتيىستى اۋقىمدا شارالاردىڭ جۇرگىزىلگەنىن جەتكىزدى.

سەسسيا ءتوراعالىق جاساعان د.ءابىش قارالاتىن ماسەلەلەردى حابارلاپ، بولىنۋگە بايلانىستى اتقارىلعان جۇمىستار تۋرالى وبلىس اكىمىنىڭ ءبىرىنشى ورىنباسارى ءا.وسەربايەۆ بايانداما جاسادى.

– 2018 جىلدىڭ 16 اقپانىندا سارىاعاش جانە ماقتاارال اۋداندارىنىڭ وكiلدi جانە اتقارۋشى ورگاندارىنىڭ اۋدان اۋماعىن ءبولۋ جولىمەن اۋداندار قۇرۋ، ولارعا اتاۋ بەرۋ، اكىمشىلىك ورتالىقتارى مەن شەكارالارىن بەلگىلەۋ تۋرالى بiرلەسكەن شەشىمدەرى قابىلداندى. وسىعان وراي، ماقتاارال اۋدانىن ءۇش اۋدانعا ياعني، ماقتاارال، اسىقاتا، جەتىساي، سارىاعاش اۋدانىن ەكى اۋدانعا ياعني، سارىاعاش، كەلەس دەپ ءبولىپ، بۇرىنعى اۋدان ورتالىقتارىن قايتا قالپىنا كەلتىرۋ ۇسىنىلادى، – دەدى.

سەسسيادا ءسوز العان وبلىستىق ءماسليحات دەپۋتاتى ءسادۋ بەكەنوۆ ماقتاارال اۋدانى 1997 جىلى 24 ساۋىردە بۇرىنعى ءۇش اۋداندى بىرىكتىرۋ ناتيجەسىندە قۇرىلعانىن ايتىپ، تاريحي ۇسىنىستى ءمىرزاشول جۇرتى ىستىق ىقىلاسپەن قابىلداپ وتىرعانىن جەتكىزدى.

– ماقتاارال اۋدانى وبلىستاعى حالقى تىعىز شوعىرلانعان جانە دەموگرافيالىق ءوسىمى جاعىنان جوعارى اۋدان سانالادى. مۇنداعى جالپى حالىق سانى 304 684 ادامدى قۇراپ وتىر. اۋدان 182 ەلدى مەكەننەن، 1 قالا، 3 كەنت جانە 20 اۋىلدىق وكرۋگىنەن قۇرالعان. سوندىقتان ماقتاارال اۋدانىن ۇشكە ءبولۋ شەشىمى ەلباسىدان قولداۋ تاۋىپ، الداعى ۋاقىتتا اتالعان وڭىرلەردىڭ الەۋمەتتىك ەكونوميكالىق حال-اقۋالى جاقسارا تۇسەتىنى ءسوزسىز. جىل كولەمىندە جۇمىس توبىن قۇرىپ، بارلىق قاجەتتى شارالاردى جۇرگىزگەن وبلىس اكىمى ج. تۇيمەبايەۆقا ريزالىعىمىزدى بىلدىرەمىز، – دەدى ءسادۋ كەتتەباي ۇلى.

ال، سارىاعاش اۋدانى 1997 جىلى بۇرىنعى سارىاعاش جانە كەلەس اۋداندارىن بىرىكتىرۋ جولىمەن قۇرىلعان. اتالعان اۋداندا بۇگىندە 326 915 حالىق تۇرادى. اۋدان اۋماعى 762203 گەكتار، 154 ەلدى مەكەنى، 1 قالا، 1 كەنت جانە 23 اۋىلدىق وكرۋگىنەن قۇرالعان.

– بۇگىنگى ۇسىنىستى تاريحي ءسات دەپ باعالاۋعا بولادى. اتالعان اۋدانداردا قازىرگى تاڭدا 630 مىڭنان استام حالىق تۇرىپ جاتىر. بۇل ەلىمىزدەگى وزگە وبلىستاردىڭ حالىقىمەن سالىستىرعاندا ەداۋىر كوپ سانالادى. ەندى ۇسىنىسىمىز ەلباسى تاراپىنان تولىق قولداۋ تاۋىپ جاتسا، ەكى اۋدانداعى حالىققا مەملەكەتتىك قىزمەت كورسەتۋ جۇكتەمەسى ازايىپ، اكىمشىلىك اۋماقتاعى بارلىق باعىتتاعى جۇمىستاردىڭ ساپاسىن كوتەرۋگە ءوز سەپتىگىن تيگىزەدى دەپ ەسەپتەيمىن، – دەدى جانسەيىت قانسەيىت ۇلى.

اتالعان ەكى اۋداندا حالىقتىڭ تىعىز ورنالاسۋ سەبەبىنەن كاسىپكەرلىكتى، اۋىل شارۋاشىلىعىن ءوز دەڭگەيىندە دامىتۋ ءۇشىن مەملەكەت تاراپىنان بەرىلەتىن قولداۋلاردى حالىققا جەتكىزۋ، تولىق جانە ساپالى قامتۋ ماسەلەلەرى ءالى دە بار. دەنساۋلىق ساقتاۋ سالاسىندا، اتاپ ايتقاندا، دەر كەزىندە مەديسينالىق كومەك كورسەتۋ، شالعايدا ورنالاسقان ەلدى مەكەن تۇرعىندارىن اۋدان ورتالىعىنداعى اۋرۋحانالار مەن پەرزەنتحانالارعا جەدەل جەتكىزۋ ماسەلەسى دە تولىق قامتۋدى قاجەت ەتەدى.

جاڭا قۇرىلاتىن اۋداندارعا اتاۋ بەرۋ ماسەلەسى رەسپۋبليكالىق ونوماستيكا كوميسسياسىنىڭ قاراۋىنا ۇسىنىلماق. ماقتاارال اۋدانىنىڭ اكىمشىلىك ورتالىعى مىرزاكەنت كەنتى، اسىقاتا اۋدانىنىڭ اكىمشىلىك ورتالىعى اسىقاتا كەنتى، جەتىساي اۋدانىنىڭ اكىمشىلىك ورتالىعى جەتىساي قالاسى بولىپ بەلگىلەنىپ وتىر.

ال سارىاعاش اۋدانىنىڭ اكىمشىلىك ورتالىعى – سارىراعاش قالاسى، كەلەس اۋدانىنىڭ اكىمشىلىك ورتالىعى رەتىندە اباي اۋىلى بەلگىلەندى.

وقو اكىمىنىڭ باسپا ءسوز قىزمەتى

https://dalanews.kz/33474