Ońtústikte 16 sý qoimasynyń qurylysy bastalmaq
«Biylǵy daiyndyq jumystarynyń joǵary deńgeide atqarylýyna bailanysty óńir topan sýdan zardap shekken joq. Alaida máseleni zerttep-zerdelegenimizde jyl saiyn 2 mlrd tekshe metr sýdyń aǵyp ketetindigine kóz jetkizdik. Aýyl sharýashylyǵyna beiimdelgen jáne jaz ailarynda sý tapshylyǵyna urynatyn aimaqta kóktemgi tasqyn sýdy tiimdi maqsatqa paidalaný eń basty másele bolyp tabylady. Sondyqtan da oblystyń aýmaǵynda ázirge 16 shaǵyn sý qoimalaryn salyp, sýarmaly egistik alqaptaryn kóbeitýdi josparlap otyrmyz. Atalǵan nysandar aimaqty tasqyn sýdan qorǵap, eginshilikti damytýǵa tikelei septigin tigizetin bolady. Endi biýdjetten qosymsha 250 mln teńge qarjy qarap, taǵy da toǵandar men sý qoimalaryn salý úshin tiisti jobalaý, josparlaý jumystaryn júrgizemiz»,- dedi Janseiit Qanseiituly.
Jalpy, oblys aýmaǵynda 43 sý qoimasy ornalasqan. Onyń ishinde 20-sy respýblikalyq, 13-i oblystyq, 4-eýi aýdandyq kommýnaldyq menshiginde. Al, 6-ýy jeke menshikke berilgen. Qazirgi tańda respýblikalyq biýdjet esebinen Toǵys, Sasyqbulaq, Aqylbeksai sý qoimalarynda 984,9 mln. teńgege kúrdeli jóndeý jumystary júrgizilýde. 2017-2019 jyldary 11,1 mlrd. teńgege 4 sý qoimasynda (Shardara, Taýshaǵa, Dosan-Qarabas, Bógen sý qoimalary) kúrdeli jóndeýden ótkiziletin bolady.
Aǵymdaǵy jyly oblystyq aýyl sharýashylyq basqarmasy kommýnaldyq menshiktegi 4 sý qoimasynda (Aqsýmbe, Baqyrly, Ashy, Tekesý) oblystyq biýdjet esebinen 384,1 mln. teńgege kúrdeli jóndeý júrgiziledi.
Budan bólek, Túrkistan qalasynda 1,7 mln. tekshe metrge arnalǵan «Qarashyq» sý qoimasynyń qurylysy júrgizilip, jyldyń aiaǵyna deiin aiaqtaý josparlanyp otyr.
OQO ákiminiń baspasóz qyzmeti
