Ońtústik shegirtkege qarsy kúreske daiyn
Inspektsiia basshysynyń aitýynsha, himiialyq kúres sharalary byltyrǵydan eki ese artyǵymen atqarylatyn bolady. Onyń ishinde marokko shegirtkesine qarsy sharalar 257,58 myń gektarda, aziialyq shegirtkege qarsy 12,4 myń gektarda, italiandyq prýs shegirtkesine qarsy 5,92 myń gektarda júrgiziledi.
«Óńdeletin alqaptyń 51 paiyzy iaǵni 140,35 myń gektary Saryaǵash aýdanyna tiisili bolsa, 20 paiyzy nemese 56,3 myń gektary Arys qalasyna tiesili. 27,2 myń gektar Shardaraǵa, 7 paiyzǵa jýyǵy nemese 20,0 myń gektar Ordabasy aýdanyna, 8 myń gektary Báidibek aýdanyna tiesili. Oblystyq aýmaqtyq inspektsiia tarapynan óńdeý jumystaryn sapaly júrgizilýin baqylaýǵa, uiymdastyrý jumystaryn júrgizýge aýdandar boiynsha 42 inspektor jáne 18 avtokólik bólinedi», – deidi Ońtústik Qazaqstan oblystyq aýmaqtyq inspektsiia basshysy Núrken Badyraqov.
Aita keteiik, 257,58 myń gektar alqapta himiialyq óńdeý jumystaryn júrgizý úshin 1574,7 myń gektar alqapta anyqtaý-zertteý jumystary júrgizý josparlanypty. Oǵan «Respýblikalyq fitosanitarlyq diagnostika jáne boljamdaý ádistemelik ortalyǵy» memlekettik mekemesiniń oblystyq filialy tarapynan shtat boiynsha 58 adam bólinip otyr. Buǵan qosymsha 3 aiǵa ýaqytsha jumysqa tartý arqyly 33 adam tartylyp, barlyǵy 91 adam anyqtaý-zertteý jumystaryn júrgizedi.
Oblys ákimi Janseiit Túimebaev úiirli shegirtkege qarsy kúres sharalaryn joǵary deńgeide uiymdastyryp, zertteý-anyqtaý sharalaryn tyńǵylyqty ári sapaly júrgizýdi eskertti.
– Úiirli shegirtkege jáne ózge de ziiankesterge qarsy himiialyq kúres sharalaryna asa jaýapkershilikpen qaraý kerek. Óńdeý jumystaryna qajetti tehnikalardy der kezinde bólý men qajetti mamandardy bólýdi aýdan jáne qala basshylaryna tapsyramyn , – dedi Janseiit Qanseiituly.
Anyqtaý-zertteý jumysyn sapaly júrgizý úshin aýdandyq, qalalyq jumyspen qamtý ortalyqtarynan qosymsha 287 anyqtaýshy bólinetin bolady. Marokko shegirtkesine qarsy himiialyq óńdeý jumystaryna 71 dana jer ústi agregaty, 5 dana AN-2 ushaǵy qaralyp otyr.
Jer ústi agregattarynyń óńdeý qýattylyǵy kúnine 100 gektar. Kúnine 7,1 myń gektar óńdelse, josparlanǵan 163,17 myń gektardy 23 kúnde aiaqtaýǵa bolady. Al, An-2 ushaǵynyń óńdeý qýattylyǵy kúnine 1,2 myń gektar. Ushaq kúnine 6,0 myń gektardy óńdese, josparlanǵan 99,71 myń gektardy 17 kúnde, jalpy himiialyq óńdeý júmystary 23-25 kúnde aiaqtalady.
OQO ákiminiń baspasóz qyzmeti
