Ońtústik Qazaqstan oblysyndaǵy mańyzdy joldar jóndeýden ótedi
Memleket basshysy Nursultan Nazarbaevtyń infraqurylymdy damytýdyń 2015-2019 jyldarǵa arnalǵan «Nurly jol» memlekettik baǵdarlamasyn júzege asyrý maqsatynda Túrkistan shaharyndaǵy 71 shaqyrym jol men 1 kópirdiń (21 nysan) qurylys-jóndeý jumystaryn jasaý men qaladaǵy 59,2 shaqyrym jol men úsh kópirdiń (5 nysan) qurylys-jóndeý jumystaryn júrgizý úshin jobalaý-smetalyq qujattama ázirleý biylǵy jylǵa kózdelip otyr. Mamandardyń málimeti boiynsha munda eki iri joba - Teke jáne Jalantóbe eldi mekenderinen ótetin oblystyq mańyzy bar uzyndyǵy 26,1 shaqyrymdy quraityn KH-84 avtomobil jolyna kúrdeli jóndeý jumystary júrgizilse, Oiyq jáne Ashysai eldi mekenderinen ótetin oblystyq mańyzy bar uzyndyǵy 33,1 shaqyrymdy quraityn KH-56 avtomobil jolyna da kúrdeli jóndeý jumystary jasalmaq. Sonymen qatar, 2017-2018 jj. 53,5 shaqyrymdy quraityn eki nysannyń ortasha jóndeý jumystary atqarylýda. Atalǵan jobalardyń jóndeý jumystary Qazaqstannyń 30 jyldyǵy, Shaǵa, Qosqorǵan, Eńbekshi Diqan, Eski Iqan, Aqtóbe jáne Ibata eldi mekenderinen ótedi.
Baǵdarlama Túlkibas aýdanyn da ainalyp ótpeidi. Munda 16 nysannyń nemese 72 shaqyrym jol men eki kópirdiń qurylys-jóndeý jumystary jáne úsh nysannyń nemese 16 shaqyrym jol men bir kópirdiń qurylys-jóndeý jumystaryn júrgizý úshin jobalaý-smetalyq qujattamalaryn ázirleýge sala mamandary qazirden-aq kirisip ketti. Atalǵan joba sheńberinde uzyndyǵy jeti shaqyrymdy quraityn T.Rysqulov, Shuqyrbulaq jáne Túlkibas eldi mekenderinen ótetin oblystyq mańyzy bar KH-64 avtomobil jolyna qaita qurý jumystary júrgiziledi dep kútilýde.
