Ońtústik Koreianyń burynǵy prezidenti Iýn Sok Iol 2024 jyly áskeri jaǵdai engizýge árekettengeni úshin ómir boiyna bas bostandyǵynan aiyryldy, dep habarlaidy Dalanews.kz.
Mundai úkimdi Seýldiń Ortalyq aýdandyq soty shyǵardy. Arnaiy prokýrorlar oǵan ólim jazasyn suraǵanymen, sot ómirlik jaza taǵaiyndady.
Sot sheshiminde negizgi aiyp retinde eks-prezidenttiń Ulttyq jinalys ǵimaratyna ásker kirgizý týraly sheshimi ataldy. Tergeý nusqasyna sáikes, bul qadam parlamenttiń jumysyn toqtatýǵa jáne saiasi protsesti kúshpen baqylaýǵa alýǵa baǵyttalǵan. Sýdialar dál osy áreketti «memlekettik qurylymǵa tikelei qaýip» dep baǵalady.
Sot otyrysy Iýn Sok Ioldiń qatysýymen ótti jáne ulttyq telearnalar arqyly tikelei efirde kórsetildi. Bul protsess el ishinde ǵana emes, halyqaralyq deńgeide de úlken rezonans týdyrdy.
Eske salsaq, Iýn Sok Iolge 2024 jyldyń jeltoqsanynda impichment jariialanǵan. Alaida resmi túrde impichment 2025 jyldyń sáýirinde sot sheshimimen bekitildi. Oǵan deiin eks-prezidentke qamaýǵa alý orderi berilgen bolatyn. Bul — Ońtústik Koreia tarihynda qyzmettegi prezidenttiń tuńǵysh ret tutqyndalýy.
Sonymen qatar, eks-birinshi hanym da qymbat syilyqtarǵa bailanysty janjaldan keiin túrmege qamaldy. Bul oqiǵa da qoǵamda úlken talqylaýǵa sebep boldy.
Iýn Sok Iol osylaisha Ońtústik Koreiadaǵy «prezidenttik qarǵys» dep atalatyn qubylystyń kezekti mysalyna ainaldy. El tarihynda prezidentterdiń basym bóligi qyzmetten keiin tergeýge tartylyp, sottalǵan, impichmentke ushyraǵan, halyqtyq tolqýlar men áskeri tóńkeristerdiń nysanasyna ainalǵan. Keibiri tipti qastandyqpen óltirilgen nemese ómirin qaiǵyly aiaqtaǵan.
Koreia tájiribesi bir nárseni kórsetedi: bul elde prezident bolý — bilik shyńy ǵana emes, asa qaýipti saiasi synaq. Iýn Sok Iolge shyǵarylǵan úkim sol júieniń kezekti qatań signaly boldy.
