Qasym-Jomart Toqaevtyń Niý-Iorkqa jumys sapary Koreia Respýblikasynyń Prezidenti Iýn Sok Iolmen kezdesýmen qorytyndylandy. Áńgimelesý barysynda qazaq-korei strategiialyq seriktestigin odan ári damytý perspektivalary talqylandy. Prezident Qazaqstan men Ońtústik Koreia arasynda dostyq qarym-qatynastar ornaǵanyn jáne qarqyndy damyp kele jatqan ekonomikalyq bailanystardyń mańyzy zor ekenin atap ótti.
Qazaqstan Prezidenti ekijaqty taýar ainalymy byltyr 6 milliard dollardan asyp, turaqty ósim baiqalyp otyrǵanyn aitty. Sonymen qatar korei kompaniialarynyń Qazaqstan ekonomikasyna salǵan investitsiialarynyń jalpy kólemi 8 milliard dollardan asyp, elimizdegi eń iri 10 investordyń qatarynda nyq turǵanyn jetkizdi.
Memleket basshysynyń aitýynsha, búginde Qazaqstanda 700-den astam koreialyq kompaniia men birlesken kásiporyn jumys isteidi. Mysaly, elimizdiń naryǵynda KIA, Hyundai, Samsung, LG jáne basqa da kompaniialar belsendi qyzmet etip jatqanyn aitýǵa bolady. Kezdesý barysynda Qasym-Jomart Toqaev sirek metaldar óndirisin, atom energetikasyn damytý salalaryndaǵy ekonomikalyq yntymaqtastyqtyń perspektivti baǵyttaryna toqtaldy.
Koreia Prezidenti Iýn Sok Iol Qazaqstanmen ózara tiimdi yntymaqtastyqty odan ári tereńdetýge múddeli ekenin jetkizdi. Onyń aitýynsha, koreialyq kompaniialar mashina jasaý, taý-ken ónerkásibi, atom energetikasy salalary boiynsha júzege asyrylyp jatqan jobalardy keńeitýge jáne jańa jobalardy qolǵa alýǵa erekshe qyzyǵýshylyq tanytady.
