Ońtústik Koreianyń burynǵy qorǵanys ministri Kim Ion Hion tergeý izoliatorynda óz-ózine qol salmaq boldy, dep habarlaidy Dalanews.kz.
“Kim Ion Hion Seýldiń shyǵysyndaǵy tergeý izoliatorynda óz-ózine qol jumsamaq boldy. Ol buǵan deiin áskeri jaǵdai engizý arqyly elde búlik uiymdastyrýǵa kómektespek boldy degen kúdikpen qamaýǵa alynǵan edi”, — delingen habarlamada.
Agenttiktiń málimetinshe, bul týraly parlamenttiń tyńdaý kezinde túzetý mekemesiniń ókili málimdegen.
Aita keteiik, kúni keshe Ońtústik Koreianyń prokýratýrasy ótken aptada elde áskeri jaǵdai engizgen prezident Iýn Sok Iolmen astyrtyn sóz bailasty dep aiyptalǵan burynǵy qorǵanys ministrin resmi túrde jazalaý úshin order suraǵan edi.
Eks-sheneýnik búlik jasady degen kúdikke ilingen.
Sońǵy 40 jylda alǵash ret engizilgen áskeri jaǵdai nebári alty saǵatqa sozylsa da, el ishinde úlken narazylyq týyndap, jappai sherýler uiymdastyryldy. Iýn men onyń jaqtastary qylmystyq tergeýge alynyp, impichmentke ushyramaq. Ádilet ministrligi Iýn men taǵy segiz adamdy negizgi kúdiktiler dep tanyp, elden shyǵýǵa tyiym saldy.
Seýldiń ortalyq okrýgtik soty burynǵy qorǵanys ministri Kim Ion Hiondy qamaýǵa alý týraly prokýrorlardyń ótinishin qarap jatqanyn habarlady. Kim Iýnǵa áskeri jaǵdai engizýdi usynǵan jáne Ulttyq assambleia depýtattarynyń daýys berýine kedergi keltirý úshin ásker jiberdi dep aiyptalyp otyr.
Kim seisenbide málimdeme jasap, “elde týyndaǵan qolaisyzdyq úshin ókinetinin aityp, keshirim surady”. Ol barlyq jaýapkershilikti óz moinyna alatynyn jetkizdi. Al buiryqty oryndaǵan sarbazdarǵa keshirim berýin ótindi.
Kim jeksenbide qamaýǵa alyndy. Eger sot order berse, ol bul iste jazaǵa tartylatyn alǵashqy adam bolmaq. Prokýrorlar Kimdi 20 kún ishinde tergep, istiń mán-jaiyn saralaýy kerek. Eger búlik jasady degen aiyp dáleldense, Kim ólim jazasyna kesilýi múmkin.
Prokýratýra Kimdi búlikke qatysýdyń basty uiymdastyrýshysy jáne Konstitýtsiiany buzý maqsatynda ásker men politsiiany paidalanyp búlik uiymdastyrdy dep aiyptaýda. Sondai-aq ol biligin asyra paidalandy degen kúdikke de ilindi. Seýl prokýratýrasy bul aiyptarǵa qatysty túsinikteme berýden bas tartty.
Aita keteiik, 3 jeltoqsanda keshke Ońtústik Koreia prezidenti Iýn Sok El tótenshe áskeri jaǵdai jariialady.
Bul sheshim oppozitsiialyq Demokratiialyq partiia Parlamentte qysqartylǵan biýdjet týraly zań jobasyn qoldap, memlekettik aýditor men bas prokýrorǵa impichment jariialaý týraly ótinish bergennen keiin qabyldandy. Alaida Ońtústik Koreianyń Ulttyq Assambleiasy elde áskeri jaǵdai engizilýine qarsy daýys berdi.
Daýys berý kezinde Ulttyq assambleia ǵimaratynda áskeri jaǵdaidy joiýdy talap etken azamattar áskeri adamdarmen, politsiiamen qaqtyǵysyp qaldy. Seýl kóshelerinde áskeri tehnika paida boldy.
Keiin el prezidenti tótenshe áskeri jaǵdaidy alyp tastaitynyn málimdedi. Onyń aitýynsha, áskeri jaǵdaidaǵy ásker shyǵarylǵan, al jaqyn arada Úkimet otyrysy ótedi.
Araǵa uzaq ýaqyt salmai el prezidenti áskeri jaǵdai engizgeni úshin halyqtan keshirim surady.
Ol budan bylai mundai qadamdarǵa barmaýǵa ýáde berdi.
"Shyn kóńilden halyqtan keshirim suraimyn", - dedi ol.
El prezidentiniń aitýynsha, mundai sharaǵa májbúrli túrde barǵan.
"Áskeri jaǵdai jariialaýǵa bailanysty jaýapkershilikten jaltarmaimyn", - dedi ol.
