Ońtústik Koreia prezidenti Iýn Sok Iol áskeri jaǵdai engizgeni úshin halyqtan keshirim surady, - dep habarlaidy Dalanews.kz.
Ol budan bylai mundai qadamdarǵa barmaýǵa ýáde berdi.
"Shyn kóńilden halyqtan keshirim suraimyn", - dedi ol.
El prezidentiniń aitýynsha, mundai sharaǵa májbúrli túrde barǵan.
"Áskeri jaǵdai jariialaýǵa bailanysty jaýapkershilikten jaltarmaimyn", - dedi ol.
Ońtústik Koreia parlamentinde prezidentke impichment jariialaý týraly zańǵa qatysty daýys berý 7 jeltoqsanǵa Astana ýaqytymen 15:00-ge belgilengen bolatyn.
Impichment jariialaý úshin depýtattardyń úshten ekisiniń daýysy qajet. Demek 300 parlamentariidiń kemi 200-i qoldaýy tiis. Olar maquldasa, Iýn Sok Ioldiń ókilettigi birden toqtatylyp, onyń mindetin premer-ministr atqarady.
Aita keteiik, 3 jeltoqsanda keshke Ońtústik Koreia prezidenti Iýn Sok El tótenshe áskeri jaǵdai jariialady.
Bul sheshim oppozitsiialyq Demokratiialyq partiia Parlamentte qysqartylǵan biýdjet týraly zań jobasyn qoldap, memlekettik aýditor men bas prokýrorǵa impichment jariialaý týraly ótinish bergennen keiin qabyldandy. Alaida Ońtústik Koreianyń Ulttyq Assambleiasy elde áskeri jaǵdai engizilýine qarsy daýys berdi.
Daýys berý kezinde Ulttyq assambleia ǵimaratynda áskeri jaǵdaidy joiýdy talap etken azamattar áskeri adamdarmen, politsiiamen qaqtyǵysyp qaldy. Seýl kóshelerinde áskeri tehnika paida boldy.
Keiin el prezidenti tótenshe áskeri jaǵdaidy alyp tastaitynyn málimdedi. Onyń aitýynsha, áskeri jaǵdaidaǵy ásker shyǵarylǵan, al jaqyn arada Úkimet otyrysy ótedi.
Qazaqstannyń Ońtústik Koreiadaǵy elshiligi qazaqstandyqtarǵa úndeý jasady.
«Koreia Respýblikasy prezidenti Iýn Sok El áskeri jaǵdai engizýine bailanysty Koreia Respýblikasynda júrgen Qazaqstan azamattaryn sabyr saqtap, jergilikti biliktiń usynystaryn oryndaýǵa jáne kópshilik is-sharalardan aýlaq bolýǵa shaqyramyz», — dep jazylǵan habarlamada.
Qazaqstan azamattary tótenshe jaǵdai kezinde jedel bailanys úshin myna nómirlerge habarlasa alady: +8210-6572-9311.
