Jýrnalist Asqarbek Qazanǵap Oreo táttisine qatysty daýly jaǵdaidy baiandady, dep habarlaidy Dalanews.kz.
Onyń sózinshe, jýyrda ónimniń qaptamasyndaǵy QR-kodty skanerlegen tutynýshylar onlain-kazino saityna ótken.
"Al búgin kompaniianyń IT-mamandary siltemeni jedel túrde ózgertip, "tehnikalyq aqaý" dep túsindirdi", - deidi ol.
Bul máseleni alǵash bolyp fýdbloger Rýslan Aitbaev jariialaǵan edi. Alaida biraz ýaqyttan keiin blogerdiń jazbasy paraqshasynan óshirilgen.
"Soǵan qaraǵanda, Oreo "tyrnaqshanyń ishindegi táttimen" ǵana shektelmei, áldekimniń aýzyn mailaǵan joq pa degen oi keledi. Óitkeni jazba izim-ǵaiym joǵalyp ketti", - dep atap ótti ol.
Al kompaniia ókilderi jaǵdaidy moiyndamai, bar bolǵany aqaýdy túzetkenin aityp, keshirim suraýdan bas tartqandai syńai tanytqan.
Jýrnalistiń pikirinshe, bul oqiǵada eki birdei zańbuzýshylyq bolýy múmkin.
"QR ÁQBtK 455-babynyń 1-bóligi - zańsyz jarnama jáne sol baptyń ózge tarmaǵy - onlain-kazinony jarnamalaý", - dep qosty ol.
Atalǵan bap boiynsha shamamen 3,6 mln teńge kóleminde aiyppul salynýy múmkin. Al qaitalanǵan jaǵdaida qylmystyq jaýapkershilikke deiin barýy yqtimal.
Soǵan qaramastan, másele keńinen talqylanbai, kompaniia daýly QR-siltemeni óshirip, "tyń" kúiinde jumysyn jalǵastyryp otyr.
"Zań bilmeý jaýapkershilikten bosatpaidy", - deidi Asqarbek Qazanǵap.
