Túrkistan oblysynda bıyl Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasyn júzege asyrýǵa 17 mlrd 570,1 mln teńge qaralyp, 73 996 adamdy jumyspen qamtý sharalaryna qatystyrý josparlanyp otyr. Bul týraly brıfıńte oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Nurjan Nurashov málimdedi, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

Atap aıtqanda, 43 714 adam bos jáne jańa jumys oryndaryna, 1 140 adam qysqa merzimdi kásiptik oqýǵa, 704 adam shaǵyn nesıe berýge, 3 650 adam «Bastaý – bıznes» jobasy aıasynda kásipkerlik negizderine oqytýǵa, 3 200 adam memlekettik grantqa, 3 050 adam áleýmettik jumys oryndaryna, 5 390 adam jastar praktıkasyna, 12 947 adam qoǵamdyq jumystarǵa, 198 adam «Alǵashqy jumys orny» jobasyna, 3 adam múgedekterge arnalǵan arnaıy jumys ornyna joldanatyn bolady.

– 2021 jyldyń 1 sáýirine deıin bıyl 23 972 adam jumyspen qamtý sharalaryna qatysyp úlgerdi. Baǵdarlamanyń ekinshi baǵyty sheńberinde «Bastaý bıznes» jobasy boıynsha bekitilgen kestege sáıkes oqý 2021 jyldyń 26 sáýirinde bastalyp, 5 aǵymda júrgiziledi. Jalpy "Bastaý Bıznes" jobasyna qatysýshylardyń orta eseppen 66,4%-y áleýmettik jáne áljýaz topqa jatatyn azamattar oqytylady, – dedi Nurjan Keńesbuly.

Sondaı-aq, brıfıńke qatysqan Túrkistan oblysy Kásipkerler Palatasy dırektorynyń ekonomıkalyq suraqtar boıynsha orynbasary Janna Tileýbekova «Bastaý – bıznes» jobasy boıynsha oqytý karantınge baılanysty onlaın formatta ótetinin habarlady.