تۇركىستان وبلىسىندا بيىل ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسىن جۇزەگە اسىرۋعا 17 ملرد 570،1 ملن تەڭگە قارالىپ، 73 996 ادامدى جۇمىسپەن قامتۋ شارالارىنا قاتىستىرۋ جوسپارلانىپ وتىر. بۇل تۋرالى بريفينگتە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى نۇرجان نۇراشوۆ مالىمدەدى، – دەپ حابارلايدى Dalanews.kz تۇركىستان وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.

اتاپ ايتقاندا، 43 714 ادام بوس جانە جاڭا جۇمىس ورىندارىنا، 1 140 ادام قىسقا مەرزىمدى كاسىپتىك وقۋعا، 704 ادام شاعىن نەسيە بەرۋگە، 3 650 ادام «باستاۋ – بيزنەس» جوباسى اياسىندا كاسىپكەرلىك نەگىزدەرىنە وقىتۋعا، 3 200 ادام مەملەكەتتىك گرانتقا، 3 050 ادام الەۋمەتتىك جۇمىس ورىندارىنا، 5 390 ادام جاستار پراكتيكاسىنا، 12 947 ادام قوعامدىق جۇمىستارعا، 198 ادام «العاشقى جۇمىس ورنى» جوباسىنا، 3 ادام مۇگەدەكتەرگە ارنالعان ارنايى جۇمىس ورنىنا جولداناتىن بولادى.

– 2021 جىلدىڭ 1 ساۋىرىنە دەيىن بيىل 23 972 ادام جۇمىسپەن قامتۋ شارالارىنا قاتىسىپ ۇلگەردى. باعدارلامانىڭ ەكىنشى باعىتى شەڭبەرىندە «باستاۋ بيزنەس» جوباسى بويىنشا بەكىتىلگەن كەستەگە سايكەس وقۋ 2021 جىلدىڭ 26 ساۋىرىندە باستالىپ، 5 اعىمدا جۇرگىزىلەدى. جالپى "باستاۋ بيزنەس" جوباسىنا قاتىسۋشىلاردىڭ ورتا ەسەپپەن 66،4%-ى الەۋمەتتىك جانە ءالجۋاز توپقا جاتاتىن ازاماتتار وقىتىلادى، – دەدى نۇرجان كەڭەسب ۇلى.

سونداي-اق، بريفينگكە قاتىسقان تۇركىستان وبلىسى كاسىپكەرلەر پالاتاسى ديرەكتورىنىڭ ەكونوميكالىق سۇراقتار بويىنشا ورىنباسارى جاننا تىلەۋبەكوۆا «باستاۋ – بيزنەس» جوباسى بويىنشا وقىتۋ كارانتينگە بايلانىستى ونلاين فورماتتا وتەتىنىن حابارلادى.