Ata-analar Úkimettiń Sara Nazarbaevaǵa tiesili "Bóbek" ortalyǵyn qaita qurý bastamasyna qarsy shyqty, dep habarlaidy Dalanews.kz.
Olar arnaiy petitsiia jariialaǵan. Aitýlarynsha, bul bastama balalarǵa jasalatyn jaǵdaiǵa keri áserin tigizýi múmkin.
"Biz, "Bóbek" gimnaziia mektebinde oqityn balalardyń ata-analary, ortalyqtyń qaita qurylý josparyna alańdaýshylyq bildirip otyrmyz. Balalarǵa sapaly bilim berý men olardyń densaýlyǵyn jaqsartý maqsatynda qurylǵan ortalyq búgingi kúnge deiin óz mindetin sátti oryndap keledi. Keshendi quramǵa engen mektep, balabaqsha, kolledj jáne oqý-saýyqtyrý kesheni búldirshinderimizdiń jan-jaqty damýy jolynda qyzmet etýde. Basqarý nysanyn ózgertý ortalyqty kommertsiialandyrýǵa alyp kelýi múmkin, bul onyń basty missiiasyna – balalarǵa qoljetimdi jáne sapaly bilim men meditsinalyq qyzmet kórsetýge áser etetini sózsiz. Sondai-aq qaita uiymdastyrý kadrlyq deńgeiler men bilim berý baǵdarlamalaryndaǵy ózgeristerge ákelýi múmkin.
Bul ortalyqqa túsý ońai emes, kóptegen ata-ana balalaryna dál osy jerde oqýǵa jáne damýǵa múmkindik berýge tyrysady. Al ortalyqty qaita qurý balalarymyzǵa jasalatyn jaǵdailardyń nasharlaýyna ákep soǵady jáne qalyptasqan balansty buzady dep oilaimyz. Biz oqý-aǵartý ministrliginen "Bóbek" ortalyǵyn qaita qurýǵa qatysty josparyn qaita qaraýdy suraimyz. Onyń basqarý formasyn ózgertkenshe, ony damytý men qoldaýǵa investitsiia quisa jón bolar edi. Biz ortalyqtyń qazirgi kúiinde saqtalǵanyn qalaimyz jáne balalarymyzdyń bolashaǵy úshin onyń múddesin qorǵaýǵa ázirmiz", - delingen petitsiia mátininde.
Eske salaiyq, buǵan deiin Ashyq NQA portalynda Sara Nazarbaevanyń "Bóbek" ulttyq ortalyǵynda ózgerister bolatyny týraly jazylǵan edi.
Oqý-aǵartý ministrligi "Bóbek" ulttyq ǵylymi-praktikalyq, bilim berý jáne saýyqtyrý ortalyǵy" respýblikalyq memlekettik qazynalyq kásipornyn qaita uiymdastyrmaq.
Vedomstvoda "Bóbektiń" ornyna balalarǵa inkliýzivti bilim berý mekemesin qurmaq.
"Qazaqstan Respýblikasy Bala quqyqtary týraly jáne Múgedekterdiń quqyqtary týraly konventsiialardy ratifikatsiialap, inkliýzivti bilim berý qaǵidattaryn iske asyrý úshin jaǵdailar jasaý jónindegi mindettemelerdi qabyldady. "Bilim týraly" Qazaqstan Respýblikasy Zańynyń 8 babynyń 6 tarmaǵyna sáikes memleket inkliýzivti bilim berýdiń maqsatyn iske asyra otyryp, bilim berýdiń barlyq deńgeiinde damý múmkindikteri shekteýli azamattarǵa olardyń bilim alýyna, damýyndaǵy aýytqýdy túzetýine jáne áleýmettik beiimdelýine arnaiy jaǵdailar jasaýdy qamtamasyz etedi.
Osyǵan bailanysty, 2029 jylǵa qarai Bilim berýdi damytý tujyrymdamasyna sáikes 100% bilim berý uiymdarynda (mektepke deiingi, orta, tehnikalyq jáne kásiptik bilim berý) inkliýzivti bilim berý úshin jaǵdai jasaý kózdelgen", - delingen qujatta.
Oqý-aǵartý ministrliginiń bul bastamasyn Qazaqstan Respýblikasynyń Úkimeti 1 tamyzda qoldaǵan.
Budan basqa, sharýashylyq júrgizý quqyǵyndaǵy memlekettik kásiporyn bolyp qaita uiymdastyrý usynylady, ol Ortalyqqa ǵylymi jáne (nemese) ǵylymi-tehnikalyq jobalar boiynsha granttyq qarjylandyrý konkýrstaryna qatysýǵa, inkliýzivti bilim berýdi damytýdyń ózekti máseleleri boiynsha zertteýler júrgizýge jáne Ortalyqta jumys isteý úshin ǵylymi kadrlardy tartýǵa múmkindik beredi.
"Bóbek" ortalyǵy 1997 jyly Sara Nazarbaevanyń bastamasymen qurylǵan. Bastapqyda uiymnyń qyzmeti balalardy fizikalyq saýyqtyrýǵa, olardyń rýhani damýy men bilim alýyna baǵyttalǵan. 2001 jyly Sara Nazarbaeva "Ózin-ózi taný" bilim berý jobasyn qolǵa aldy.
