اتا-انالار ۇكىمەتتىڭ سارا نازاربايەۆاعا تيەسىلى "بوبەك" ورتالىعىن قايتا قۇرۋ باستاماسىنا قارسى شىقتى، دەپ حابارلايدى Dalanews.kz.

ولار ارنايى پەتيسيا جاريالاعان. ايتۋلارىنشا، بۇل باستاما بالالارعا جاسالاتىن جاعدايعا كەرى اسەرىن تيگىزۋى مۇمكىن.

"ءبىز، "بوبەك" گيمنازيا مەكتەبىندە وقيتىن بالالاردىڭ اتا-انالارى، ورتالىقتىڭ قايتا قۇرىلۋ جوسپارىنا الاڭداۋشىلىق ءبىلدىرىپ وتىرمىز. بالالارعا ساپالى ءبىلىم بەرۋ مەن ولاردىڭ دەنساۋلىعىن جاقسارتۋ ماقساتىندا قۇرىلعان ورتالىق بۇگىنگى كۇنگە دەيىن ءوز مىندەتىن ءساتتى ورىنداپ كەلەدى. كەشەندى قۇرامعا ەنگەن مەكتەپ، بالاباقشا، كوللەدج جانە وقۋ-ساۋىقتىرۋ كەشەنى بۇلدىرشىندەرىمىزدىڭ جان-جاقتى دامۋى جولىندا قىزمەت ەتۋدە. باسقارۋ نىسانىن وزگەرتۋ ورتالىقتى كوممەرسيالاندىرۋعا الىپ كەلۋى مۇمكىن، بۇل ونىڭ باستى ميسسياسىنا – بالالارعا قولجەتىمدى جانە ساپالى ءبىلىم مەن مەديسينالىق قىزمەت كورسەتۋگە اسەر ەتەتىنى ءسوزسىز. سونداي-اق قايتا ۇيىمداستىرۋ كادرلىق دەڭگەيلەر مەن ءبىلىم بەرۋ باعدارلامالارىنداعى وزگەرىستەرگە اكەلۋى مۇمكىن.

بۇل ورتالىققا ءتۇسۋ وڭاي ەمەس، كوپتەگەن اتا-انا بالالارىنا ءدال وسى جەردە وقۋعا جانە دامۋعا مۇمكىندىك بەرۋگە تىرىسادى. ال ورتالىقتى قايتا قۇرۋ بالالارىمىزعا جاسالاتىن جاعدايلاردىڭ ناشارلاۋىنا اكەپ سوعادى جانە قالىپتاسقان بالانستى بۇزادى دەپ ويلايمىز. ءبىز وقۋ-اعارتۋ مينيسترلىگىنەن "بوبەك" ورتالىعىن قايتا قۇرۋعا قاتىستى جوسپارىن قايتا قاراۋدى سۇرايمىز. ونىڭ باسقارۋ فورماسىن وزگەرتكەنشە، ونى دامىتۋ مەن قولداۋعا ينۆەستيسيا قۇيسا ءجون بولار ەدى. ءبىز ورتالىقتىڭ قازىرگى كۇيىندە ساقتالعانىن قالايمىز جانە بالالارىمىزدىڭ بولاشاعى ءۇشىن ونىڭ مۇددەسىن قورعاۋعا ءازىرمىز"، - دەلىنگەن پەتيسيا ماتىنىندە.

ەسكە سالايىق، بۇعان دەيىن اشىق نقا پورتالىندا سارا نازاربايەۆانىڭ "بوبەك" ۇلتتىق ورتالىعىندا وزگەرىستەر بولاتىنى تۋرالى جازىلعان ەدى.

وقۋ-اعارتۋ مينيسترلىگى "بوبەك" ۇلتتىق عىلىمي-پراكتيكالىق، ءبىلىم بەرۋ جانە ساۋىقتىرۋ ورتالىعى" رەسپۋبليكالىق مەملەكەتتىك قازىنالىق كاسىپورنىن قايتا ۇيىمداستىرماق.

ۆەدومستۆودا "بوبەكتىڭ" ورنىنا بالالارعا ينكليۋزيۆتى ءبىلىم بەرۋ مەكەمەسىن قۇرماق.

"قازاقستان رەسپۋبليكاسى بالا قۇقىقتارى تۋرالى جانە مۇگەدەكتەردىڭ قۇقىقتارى تۋرالى كونۆەنسيالاردى راتيفيكاسيالاپ، ينكليۋزيۆتى ءبىلىم بەرۋ قاعيداتتارىن ىسكە اسىرۋ ءۇشىن جاعدايلار جاساۋ جونىندەگى مىندەتتەمەلەردى قابىلدادى. "ءبىلىم تۋرالى" قازاقستان رەسپۋبليكاسى زاڭىنىڭ 8 بابىنىڭ 6 تارماعىنا سايكەس مەملەكەت ينكليۋزيۆتى ءبىلىم بەرۋدىڭ ماقساتىن ىسكە اسىرا وتىرىپ، ءبىلىم بەرۋدىڭ بارلىق دەڭگەيىندە دامۋ مۇمكىندىكتەرى شەكتەۋلى ازاماتتارعا ولاردىڭ ءبىلىم الۋىنا، دامۋىنداعى اۋىتقۋدى تۇزەتۋىنە جانە الەۋمەتتىك بەيىمدەلۋىنە ارنايى جاعدايلار جاساۋدى قامتاماسىز ەتەدى.

وسىعان بايلانىستى، 2029 جىلعا قاراي ءبىلىم بەرۋدى دامىتۋ تۇجىرىمداماسىنا سايكەس 100% ءبىلىم بەرۋ ۇيىمدارىندا  (مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ)  ينكليۋزيۆتى ءبىلىم بەرۋ ءۇشىن جاعداي جاساۋ كوزدەلگەن"، - دەلىنگەن قۇجاتتا.

وقۋ-اعارتۋ مينيسترلىگىنىڭ بۇل باستاماسىن قازاقستان رەسپۋبليكاسىنىڭ ۇكىمەتى 1 تامىزدا قولداعان. 

بۇدان باسقا، شارۋاشىلىق جۇرگىزۋ قۇقىعىنداعى مەملەكەتتىك كاسىپورىن بولىپ قايتا ۇيىمداستىرۋ ۇسىنىلادى، ول ورتالىققا عىلىمي جانە (نەمەسە) عىلىمي-تەحنيكالىق جوبالار بويىنشا گرانتتىق قارجىلاندىرۋ كونكۋرستارىنا قاتىسۋعا، ينكليۋزيۆتى ءبىلىم بەرۋدى دامىتۋدىڭ وزەكتى ماسەلەلەرى بويىنشا زەرتتەۋلەر جۇرگىزۋگە جانە ورتالىقتا جۇمىس ىستەۋ ءۇشىن عىلىمي كادرلاردى تارتۋعا مۇمكىندىك بەرەدى.

"بوبەك" ورتالىعى 1997 جىلى سارا نازاربايەۆانىڭ باستاماسىمەن قۇرىلعان. باستاپقىدا ۇيىمنىڭ قىزمەتى بالالاردى فيزيكالىق ساۋىقتىرۋعا، ولاردىڭ رۋحاني دامۋى مەن ءبىلىم الۋىنا باعىتتالعان. 2001 جىلى سارا نازاربايەۆا "ءوزىن-وزى تانۋ" ءبىلىم بەرۋ جوباسىن قولعا الدى.