QR Energetika ministri Erlan Aqkenjenov "QazMunaiGaz" UK AQ basshylyǵymen jáne Atyraý, Pavlodar, Shymkent munai óńdeý zaýyttarynyń direktorlarymen kezdesýinde 2040 jylǵa deiingi munai óńdeý salasyn damytý tujyrymdamasyna sáikes, óndiris qýatyn arttyrýǵa baǵyttalǵan jobalardy jedeldetýdi tapsyrdy, dep habarlaidy Dalanews.kz.
Quzyrly vedomstvo málimetinshe, Úkimet bekitken tujyrymdamaǵa sáikes, elimizde munai óńdeý kólemi jylyna 18 million tonnadan 39 million tonnaǵa deiin, iaǵni shamamen eki esege artady.
Jobalardyń basty sharty – janarmai jáne munai-himiia óndirisin zamanaýi shemamen júzege asyrý. Bul janarmaimen qatar joǵary suranysqa ie munai-himiia ónimderin shyǵarýdy qamtamasyz etedi. Nátijesinde ishki naryqty janar-jaǵarmaimen tolyq qamtyp, qosylǵan quny joǵary ónimderdiń eksporttyq áleýetin qalyptastyrýǵa múmkindik beredi.
Keńeste atalǵan zaýyttardyń jańǵyrtý jobalarynyń aǵymdaǵy jaǵdaiy men jumys kestesi jan-jaqty talqylandy. Ministr Shymkent MÓZ-iniń óndiristik qýatyn jylyna 6-dan 12 mln. tonnaǵa deiin ulǵaitý jobasyn sheteldik seriktestermen jedel iske asyrý qajettigin atap ótti. Osy maqsatta Beijińde CNPC kompaniiasymen kelissózder júrgizý josparlanǵan. Sonymen birge ministr Pavlodar MÓZ-diń qýatyn 9 mln. tonnaǵa deiin kóterý jobasyn jyldam iske asyrýdy tapsyrdy. Al Atyraý MÓZ-inde óndiris kólemin jylyna 6,7 mln tonnaǵa deiin ulǵaitý jáne zaýyttyń tiimdiligin arttyrý, sonymen qatar jóndeý aralyq kezeńderin uzartý jobalaryna erekshe nazar aýdarylýda.
"Árbir munai óńdeý zaýytynyń qýatyn arttyrý jobasy meniń jeke baqylaýymda. Maqsatymyz suranysty qanaǵattandyrý ǵana emes, ony aldyn ala qamtyp, ekonomikalyq senimdilikti qalyptastyryp, eldi tolyq otandyq ónimmen qamtamasyz etý. Ministrlik biýrokratiialyq kedergilerdi joiýǵa jáne vedomstvoaralyq máselelerdi sheshýge qoldaý kórsetedi. Osy rette, "QazMunaiGaz" UK AQ men zaýyt basshylarynyń jedeldetilgen joba kestesin qatań baqylaýda ustap, jumyla jumys jasaýyn talap etemin", – dedi QR Energetika ministri Aqkenjenov.
Keńes sońynda kompaniia basshylaryna jobalardyń jol kartalaryn jańartý tapsyryldy. Energetika ministrligi olardyń oryndalýyn ai saiyn baqylap otyrady.
Aita ketsek, 2029 jyldan bastap shaǵyn janar-jaǵarmai óndirýshi zaýyttar K-4, K-5 sanatyndaǵy otyn óndirisin ulǵaitýǵa mindettelmek.
