İshki ister mınıstrligi "Zań jáne tártip" qaǵıdaty aıasynda esirtki qylmysyna qarsy iri jedel-profılaktıkalyq shara júrgizýde. "Qarasora-2025" operasıasynyń basty maqsaty – esirtki ósimdikteriniń tabıǵı oshaqtary men jasyryn egistikterin joıý, zerthanalardyń qyzmetin toqtatý jáne uıymdasqan qylmystyq toptardyń jolyn kesý, dep habarlaıdy Dalanews.kz.

Naýqanǵa İİM-niń arnaıy jasaqtary men Ulttyq ulan sarbazdary tartyldy. Jedel áreketterde ushqyshsyz ushý apparattary men tikushaqtar qoldanylyp, úsh aı ishinde 40 áýe reıdi jasaldy. Sonyń nátıjesinde:

• 20 esirtki alqaby anyqtaldy;

• 5 myńnan astam ósimdik joıyldy;

• 1 tonnadan artyq zańsyz ónim tárkilendi.

Óńirler boıynsha da aýqymdy nátıjeler bar. Máselen, Ulytaý oblysynda ońtústikten esirtki jetkizýmen aınalysqan qylmystyq top quryqtalyp, odan 103 keli marıhýana men qarý-jaraq tabyldy. Jambylda 206 keli esirtki daıyndaǵan eki azamat ustaldy. BQO-da jylyjaıdan 135 keli qarasora, Túrkistanda 650 keliden astam qarasora men 48 keli kóknár alyndy. Al Jezqazǵan men Sátbaev qalalarynda zańsyz tasymaldanǵan 43 tonna kóknár anyqtaldy.

"Qarasora-2025" aıasynda:

• 677 qylmystyq is tirkeldi (onyń ishinde 242 – satý, 220 – zańsyz egis);

• 2 tonna marıhýana, 47 keli gashısh, 3 tonna qarasora, 155 keli sıntetıka jáne 8,5 tonna prekýrsor tárkilendi;

• 27 myńnan astam ósimdik joıyldy;

• 9 zerthana men 3 uıymdasqan toptyń qyzmeti toqtatyldy (sonyń ishinde bireýi transulttyq).