Jalpy pandemıa kezeńinde de Túrkistan oblysynda qurylys jumystary bir sátke toqtaǵan emes. Búginde Túrkistan oblysy men onyń ortalyǵy alyp qurylys alańyna aınalǵan. Óńirde turǵyndardy úımen qamtý baǵytynda aýqymdy jumys qolǵa alynǵan. Byltyr 11 aıda paıdalanýǵa berilgen turǵyn úıdiń jalpy alańy 600 myń sharshy metrden asty.
Óńir basshysy Túrkistandaǵy «Kerýen saraı», «Iassy eko vılladj» turǵyn úı keshenderin aralap, jumysyn saralady. Atalǵan turǵyn úılerdiń qurylysy talapqa saı júrip jatyr. Sonymen birge Qoja Ahmet Iasaýı mýzeıi, «Qylýet» meshiti, «Daryn» mektep-ınternaty, İshki ister departamenti, jedel járdem stansıasy ǵımarattarynyń qurylysyn da qadaǵalady. Iassy kóshesin abattandyrý jumystary da nazardan tys qalǵan joq. Bul áleýmettik jáne rýhanı nysandar iske qosylǵan soń túrkistandyqtardyń ómir súrý sapasyn jaqsartýǵa úles qosatyny sózsiz.
Oblys ákimi Túrkistandy túrki áleminiń mádenı-rýhanı ortalyǵyna aınaldyrý baǵytyndaǵy jumystar jalǵasa beretinin jetkizdi.
– Respýblıkada biraz qıynshylyqtar boldy. Biraq eldiń birliginiń jáne Prezıdentimizdiń batyl sheshimderiniń arqasynda jaǵdaı turaqtaldy. Túrkistan oblysynda jaǵdaı turaqty. Óńirdegi ózekti máseleler jiti baqylaýǵa alynǵan. Qazirgi tańda Túrkistan qalasynda 200 jańa nysan men ǵımarattyń qurylysy júrip jatyr. Barlyq qurylys kompanıa basshylarymen jeke-jeke kezdesip, jumys kestesin quryp, jumysshylardy qurylys alańyna shyǵaryp, jumysty jandandyryp jatyrmyz. Ol nysandardyń bári óz merziminde tapsyrylady dep senemin. Memlekettik qoldaýdyń nátıjesinde óńir damyp keledi. Oblysty órkendetý jolyndaǵy iri jobalar ýaqtyly ári talapqa saı júzege asady, – deıdi oblys ákimi Ómirzaq Shókeev.
Túrkistan qalasynda respýblıkada teńdesi joq jobalar júzege asady. Solardyń biri – halyqaralyq talapqa saı eskek esý bazasy. 80 gektardan astam aýmaqty alyp jatqan bazada eskek esý, akademıalyq esý jáne ózge de sport túrleri damıdy. Bul nysan týrıserdi tartatyn ortalyqqa da aınalmaq. Kásibı sportpen qatar munda qaıyqpen serýendep, jaǵajaı voleıbolyn oınap, demalysty ótkizýge bolady. Sondaı-aq Túrkistan qalasynyń klımatyn ózgertý, jasyl alqapty kóbeıtý baǵytynda da eskek esý bazasynyń mańyzy zor. Munymen qatar oblys ákimi «Muz saraıy», B.Sattarhanov atyndaǵy sporttyq-saýyqtyrý ortalyǵy, tenıs ortalyǵy jáne fýtbol akademıasyn salý jumystaryn saralap, merdigerler men jaýapty basshylarǵa tapsyrmalar berdi.
Atalǵan sport nysandary halyqaralyq jarystar ótkizýmen qatar túrli sport túrlerinen komandalardyń oqý-jattyǵý jumysyn ótkizýine de oń serpin bermek. Iaǵnı, jańa sport nysandary óńirge kelýshiler sanynyń artýyna tikeleı úles qosady.
