Taraptar áńgimelesý barysynda eki el arasyndaǵy týrizm men ózara áriptestik qarym-qatynas týraly pikirlesip, oi bólisti. Túrkistan oblysynyń ákimi AQSh Qazaqstannyń halyqaralyq arenadaǵy jetekshi seriktesteriniń biri ekenin atap ótti.
– Biz úshin AQSh – senimdi seriktes. Pandemiiaǵa qaramastan Túrkistan oblysynda jumystar toqtaǵan emes. Investitsiialar tartyp, jańa, zamanaýi jobalardy iske asyrý úshin investorlarǵa asa qolaily jaǵdai jasaýǵa erekshe nazar aýdarylady. Týrizmniń barlyq baǵyty biz úshin úlken basymdyqqa ie. Qonaq úiler, oiyn-saýyq keshenderi, týristerge qyzmet kórsetý, jeńil ónerkásip, mashina jasaý, himiialyq óndiris, qaita óńdeý, aýyl sharýashylyǵy syndy baǵyttarda senimdi seriktes bolýǵa ashyqpyz, – dedi Ómirzaq Shókeev.
– Kezinde Qazaqstannyń jańa astanasynyń salynýynyń kýási bolǵan edim, endi mine, rýhani astananyń qaryshtap damýyn kórip, keremet áser aldym. Sol ýaqyttaǵy Astana osyndai bolatyn. Túrkistannyń sanaýly ýaqyttan keiin qandai bolyp ózgeretinin kóz aldyma elestettim. Týrizm salasy investorlardy qyzyqtyrady dep oilaimyn. Jáne jolda kele jatyp, bizdiń tehnologiiany Túrkistan aýmaǵynda paidanatyndaryńyzdy kórdim. Jańbyrlatyp sýarý – óte tiimdi ádis, ásirese jergilikti klimat úshin taptyrmas tásil. Mundaida aǵashtardyń kógerýiniń qanshalyqty qiyn ekenin jaqsy túsinemin. Óte az ýaqytta kóp jumystar atqarylǵan eken. Adamdar igiligi úshin atqarylyp jatqan oń ister kórinip tur, – dedi AQSh Elshisi.
Sheteldik delegatsiia Túrkistan óńiri men oblys ortalyǵynyń bolashaq ekonomikalyq damý baǵytyna oń baǵa berip, aimaqtyń aldaǵy jylǵy damý tujyrymdamasyndaǵy birqatar jobalarǵa qyzyǵýshylyq tanytty. Qazaq ulttyq mádenietiniń eń baiyrǵy, asa qundy salalarynyń biri – qolónerine qyzyǵýshylyq tanytty. Taraptar eki el halyqtarynyń igiligi úshin barlyq baǵyttar boiynsha eki jaqty yntymaqtastyqty odan ári nyǵaitýǵa nietti.
