Buqaralyq aqparat quraldarynda Bolat Ótemuratovtyń sotty bolǵan týysyna shartty emes, naqty merzim berilgeni týraly aqparat tarady, - dep habarlaidy Dalanews.kz.
Oligarhtyń jaqyny Daniiar Ótemuratov byltyr alaiaqtyq jasady degen kúdikpen ustalǵan edi. Onyń aǵasy Bolat Ótemuratov 2,7 milliard dollarlyq bailyqqa ie, sonyń arqasynda Forbes jýrnalynyń eń bai qazaqstandyqtar tiziminde 2-orynda tur.
"Biyl aqpanda Daniiar Ótemuratov 5 jylǵa bas bostandyǵyn shekteý jazasyna kesildi. Keshe Astananyń qylmystyq ister jónindegi sot alqasy úkimdi ortasha qaýipsizdik mekemesinde 5 jylǵa bas bostandyǵynan aiyrý jazasyna ózgertti", - dep jazdy Chinovnik arnasy.
Aita keteiik, buǵan deiin Astanada Daniiar Ótemuratovtyń isi boiynsha úkim jariialandy. Bul týraly jýrnalist Mihail Kozachkov jazdy.
Kozachkovtyń málimetinshe, Bolat Ótemuratovtyń týysy 2021 jyly Atyraýda alaiaqtyq jasaǵany jáne para berýge itermelegeni úshin sottalǵan UQK-niń burynǵy qyzmetkeri Tóleýbaevpen tanysqan. UQK burynǵy qyzmetkeri Joǵarǵy sotta aqtalǵysy keletinin, sodan keiin jumysqa qaita oralýdy kókseitinin aitqan. Ótemuratovtar otbasynyń ókili oǵan Prezident ákimshiligi men sot organdarynda bailanysy baryn, kómektese alatynyn aitqan. Osylaisha 50 myń dollar úshin másele sheshiletinin jetkizgen.
Tóleýbaev kelisip, birneshe kúnnen keiin 30 myń ákelgen, sodan keiin onyń jubaiy Daniiar Ótemuratovtyń shotyna taǵy 20 myń dollar aýdarǵan. Osydan keiin Ótemuratovtyń týysy joǵalyp ketedi, ol qońyraýlar men habarlamalarǵa jaýap bermei, aqshany da qaitarmai júrip alǵan. Sol kezde Tóleýbaev quzyrly organdarǵa aryz berýge májbúr bolǵan. Biraq Daniiar aqsha berýge asyqpaidy. Byltyr qarashada politsiia ony tutqyndaýǵa ruqsat alǵannan keiin ǵana 50 myń dollardy birden qaitarǵan.
Al sotta Ótemuratov kinásin tolyq moiyndap, ókinip, isti qysqartylǵan tártippen qaraýdy ótingen. Ol sol kezde Qyzylorda oblysynda qandai da bir nysan salyp jatqanyn jáne armatýrany tóleýge qarajaty jetpegenin málimdegen. Onyń Joǵarǵy sotta jáne Prezident ákimshiliginde eshqandai tanystary bolmaǵanyn da jetkizdi.
Aqyrynda Daniiar Ótemuratov alaiaqtyq jasaǵany úshin kináli dep tanylyp, 5 jylǵa shartty merzimge sottaldy. Kozachkov bul tusta sybailas jemqorlyq qylmysy da baryn aitqan edi. Alaida sol kezde Ótemuratov mundai qatań stsenarii boiynsha sottalmady.
