Qurylysshylar toby prezident Qasym-Jomart Toqaevqa úndeý joldap, oligarh Álidar Ótemuratovtyń zańsyz áreketinen qorǵaýdy surady, dep habarlaidy Dalanews.kz.
Jábirlenýshilerdiń úndeýin KazTAG redaktsiiasy jariialady.
“Qurmetti Qasym-Jomart Kemeluly! Biz – Omarov Daniiar Talǵatuly, Bajeja Aleksandr Viktorovich jáne taǵy tórt áriptesimiz bir-birimen etene bailanysqan oligarhat pen quqyq qorǵaý organdarynyń qurbany bolyp otyrmyz. Álidar Ótemuratovtyń qol astyndaǵylar bizge qarsy 1,5 mlrd teńge kóleminde jalǵan qylmystyq is qozǵaýda”, – dedi Omarov pen Bajeja Toqaevqa joldaǵan beineúndeýinde.
Aitýlarynsha, úsh jyl buryn olar Almatyda Álidar Ótemuratovtyń otbasyna villa salýmen ainalysqan.
“Barlyq merdiger men olardyń atqaratyn jumysyn villa iesimen tikelei aqyldasyp otyrdyq. Barlyq jumys kelisimshartqa sai ýaqytynda aiaqtalyp, tehnikalyq jáne avtorlyq baqylaýdan ótken bolatyn. Alaida bizdi 1,5 mlrd teńge jymqyrdy dep aiyptap otyr. Birinshiden, bul soma obektivti jáne kásibi esepteýlermen rastalmaǵan. Sondyqtan sandardy oidan shyǵarǵan dep esepteimiz. Ekinshiden, biz bul somaǵa múldem qol suqpadyq, aqsha túrinde de, basqa túrde de. Úshinshiden, merdigerlerdiń barlyq shyǵynyn Álidar Ótemuratovtyń ózi bekitip otyrdy. JShS seriktestiginiń óz qarajaty bolmaǵan. Merdigerlerge tólemder tek Ótemuratov kelisim bergen somada túsip, olarǵa jiberildi”, – dedi olar.
Qurylysshylardyń sózinshe, taǵylǵan aiyptaýlardyń negizsiz ekenin dáleldeitin qujattar da bar.
“Bizdiń oiymyzsha, atalǵan istiń negizinde jatqan sot-qurylys saraptamasy jalǵan. Is materialdarynyń ózinde saraptama júrgizilgen kezde nysandardyń buzylyp ketkeni kórsetilgen. Iaǵni, olar joq. Endeshe, joq nárseni qalai zertteýge bolady? Eń mańyzdysy – politsiia Álidar Ótemuratovtyń yqpaldy adam ekenin meńzei otyryp, bizdiń qamaýǵa alynatynymyzdy astarly túrde eskertip otyr. Quqyq qorǵaý jáne qadaǵalaý organdarynyń keibir joǵary laýazymdy ókilderi isti Ótemuratovtyń paidasyna sheshý týraly tapsyrma alǵan sekildi. Is negizinde azamattyq deńgeide qaralýy tiis, biraq tergeý birjaqty júrip jatyr. Sondyqtan sizden kómek suraimyz, Qasym-Jomart Kemeluly!” – dep málimdedi qurylysshylar.
Olar ózderiniń kinásiz ekenin jáne kez kelgen suraqqa jaýap berýge daiyn ekenin aitty.
“Biz kez kelgen suraqqa jaýap berýge jáne kez kelgen áreketimiz úshin esep berýge daiynbyz. Bizge tek ádildik qajet. Ókinishke qarai, quqyq qorǵaý organdary óte asyǵys. Sebebi olar Ótemuratovpen bailanysty bolýy múmkin. Ádildik ornatýǵa kómektesýińizdi suraimyz!” – dep qurylysshylar Toqaevqa úndeý joldady.
Aita keteiik, Álidar Ótemuratov - qazaqstandyq biznesmen. Tsifrlyq servister men mobildi qosymshalardy ázirleýmen ainalysady. Telekommýnikatsiia, taý-ken, sodan keiin bank jáne finteh sektorlarynyń korporatsiialarynda jumys istegen. Belgili qazaq oligarhy Bolat Ótemuratovtyń uly.
Al Bolat Ótemuratov "Vernyi kapital" investitsiialyq tobynyń basqarýyndaǵy jobalardyń negizgi investory jáne ataýly qaiyrymdylyq qorynyń qyzmetine jetekshilik etedi. Sondai-aq ol Qazaqstan tennis federatsiiasynyń prezidenti jáne Halyqaralyq tennis federatsiiasynyń (International Tennis Federation) vitse-prezidenti. Onyń esimi ATF bank, Temirbank, Alians bank, Kassa Nova, ForteBank ataýlarymen qatar jii atalady.
2023 jyly Forbes nusqasy boiynsha onyń dáýleti 2,7 mlrd dollarǵa baǵalandy. Ótemuratov ForteBank aktsiialarynyń 83,41%-yna ie. Sondai-aq KaR-Tel (Qazaqstandaǵy Beeline operatory), altyn óndirýshi RG Gold kompaniialary, Astana men Venadaǵy Ritz-Carlton qonaq úileri, Máskeýdegi The Carlton, Rixos Borovoe kompaniiasy aktsiialarynda da onyń úlesi bar.
