Qazaqstan Premer-Ministri Oljas Bektenov Jetisý oblysyna jumys sapary aiasynda Memleket basshysynyń tapsyrmasy boiynsha iske asyrylyp jatqan «Taldyqorǵan – Úsharal» magistraldy gaz qubyry qurylysynyń barysymen tanysty, – dep habarlaidy Dalanews.kz.
«Taldyqorǵan – Úsharal» magistraldy gaz qubyrynyń jalpy uzyndyǵy 302,4 km quraidy. Joba aiasynda alty gaz burý qubyry men avtomatty gaz taratý stansalaryn salý kózdelgen. Gaz qubyrynyń ótkizý múmkindigi – jylyna 385 mln m3 gaz. «QazaqGaz» UK» AQ basqarma tóraǵasy Sanjar Jarkeshov nysan «Almaty – Taldyqorǵan» magistraldy gaz qubyrynyń qoldanystaǵy biryńǵai júiesiniń quramynda paidalanylatynyn, qurylysty aiaqtap, iske qosý 2026 jyldyń sońyna josparlanyp otyrǵanyn baiandady.
Jańa «Taldyqorǵan – Úsharal» magistraldy gaz qubyry 124 myń turǵyny bar Aqsý, Sarqan, Alakól aýdandarynyń 66 eldi mekenin tabiǵi gazben qamtamasyz etedi. Qurylysy aiaqtalyp, iske qosylǵannan keiin oblysty gazdandyrý deńgeii 47,6%-dan 90%-ǵa deiin ósedi.
Jalpy, Jetisý oblysynda 358 eldi mekenniń 192-si gazdandyrýǵa jatady, 37 eldi meken gazben qamtyldy, 334 myń adam (47,6%) gazǵa qol jetkizdi. Elimizde barlyǵy 2023 jyldyń qorytyndysy boiynsha halyqty gazben qamtý deńgeii 60%-dy qurady (12 mln adamǵa gaz qoljetimdi).
«Memleket basshysy bastamashylyq etken aýqymdy infraqurylym jobalaryn iske asyrýǵa Úkimet erekshe mán beredi. Ekonomika úshin basym jobalardy qarjylandyrýǵ "Samuryq-Qazyna" jáne "Báiterek" holdingteriniń, ishki kapital naryǵynyń resýrstary men qarajaty, tikelei sheteldik investitsiialar men jeke kapital belsendi túrde tartylýda. "Samuryq-Qazyna" qarajaty esebinen 42 gazben qamtý jobasyn iske asyrýǵa 10,4 mlrd teńge bólindi. Bul jyl sońyna deiin Jetisý oblysyndaǵy taǵy 30 eldi mekendi gazben jabdyqtaýǵa múmkindik beredi», — dep atap ótti Oljas Bektenov.
Úkimet basshysy jobalardy iske asyrý kezinde taýarlar men qyzmetterdegi qazaqstandyq qamtýdyń barynsha joǵary úlesin qamtamasyz etý qajettigine toqtaldy.
Energetika ministrligine jáne «QazaqGaz» ulttyq kompaniiasyna, oblys ákimdigine belgilengen merzimderdi saqtai otyryp, jobalardy sapaly iske asyrý úshin barlyq sharany qabyldaý tapsyryldy. Sonymen qatar jeke úilerge gazdyń qosylýyn baqylaýdy kúsheitý tapsyryldy.
