Premer-Ministri Oljas Bektenov «Shevron» kompaniiasynyń Eýraziialyq bólimshesiniń Basqarýshy direktory Derek Magnesspen kezdesti, – dep habarlaidy Dalanews.kz.
Premer-Ministr Memleket basshysy Qasym-Jomart Toqaevtyń tapsyrmasy boiynsha respýblikada aýqymdy ekonomikalyq reformalar júrgizilip jatqanyn aitty. Olar Jalpy ishki ónimniń jyl saiyn 6%-ǵa jáne odan da joǵary ósimin qamtamasyz etýi tiis.
– Úkimet investorlarǵa investitsiialyq jobalardy damytý úshin barynsha qolaily jaǵdailar jasaidy jáne qajetti qoldaý kórsetedi. Óz kezeginde biz seriktesterimizden jergilikti áleýetti barynsha paidalanýdy, tehnologiialar transfertin, shikizatty tereń óńdeýdi kózdeitin birlesken josparlardy ýaqytyly iske asyrý boiynsha belsendi is-qimyldardy kútemiz, – dedi Oljas Bektenov.
Premer-Ministr Teńiz ken ornynda saǵalyq qysymdy basqarý jáne bolashaq keńeitý jobalarynyń sáikesinshe 2025 jyldyń birinshi jartyjyldyǵynda jáne 2024 jyldyń birinshi jartyjyldyǵynda aiaqtalýyn qamtamasyz etý kerektigin aitty.
Sonymen qatar Premer-Ministr Úkimet Qarashyǵanaq ken ornyn igerýge úlken mán berip otyrǵanyn atap ótti. Bul rette munai men kondensat óndirýdi jylyna eń kemi 11 mln tonna deńgeiinde ustap turý negizgi basymdyq bolyp tabylady.
– Qarashyǵanaqta qýaty jylyna 4 mlrd tekshe metrdi quraityn gaz óńdeý zaýytyn salý jobasyn iske asyrý týraly tujyrymdamalyq sheshim ken ornynyń bolashaq damýy úshin mańyzdy ekenin atap ótkim keledi, – dedi Oljas Bektenov.
Sonymen qatar Premer-Ministr ekonomikalyq saiasattyń basymdyqtarynyń biri jergilikti qamtýdy damytý ekenine nazar aýdardy.
– Operatorlardyń qajettilikteri úshin ónim shyǵarýǵa múddeli jergilikti óndirýshilermen tyǵyz qarym-qatynas qajet. Bul rette eger elde qajetti taýarlar nemese jabdyqtar óndirilmese, onda biz osy óndiristerdi aldaǵy 2-3 jylda Qazaqstan aýmaǵynda lokalizatsiialaý jónindegi naqty josparlardy kórgimiz keledi. Sondyqtan osy baǵyttaǵy jumysty qaita qaraýdy ótinemin, – dedi Úkimet basshysy.
Óz kezeginde Derek Magness «Shevron» kompaniiasynyń Qazaqstanmen barlyq múddeli baǵyttar boiynsha yntymaqtastyqty nyǵaitýǵa ázir ekenin rastady.
– Biz birge jumys istep, aradaǵy seriktestikti damytýǵa múddelimiz. «Shevron» Qazaqstannyń ekonomikasyn damytý úshin jumsalyp jatqan kúsh-jigerdi qoldaidy. Búginde investitsiialar men jańa jobalar úshin jaqsy jaǵdailar jasalyp jatyr. Ózara seriktestikke negizdelgen bolashaqtaǵy damý múmkindikterin kórip otyrmyz, – dedi ol.
