Qazaqstan Premer-Ministri Oljas Bektenovtiń tóraǵalyǵymen "Báiterek" ulttyq basqarýshy holdingi" AQ direktorlar keńesiniń otyrysy ótti, dep habarlaidy Dalanews.kz.
Úkimet basshysyna holdingtiń investitsiialyq jáne qarjylyq qyzmetiniń, onyń enshiles qurylymdarynyń nátijeleri jáne memlekettik baǵdarlamalardy iske asyrý sheńberinde otandyq taýar óndirýshilerdi qoldaýdyń jańa quraldaryn engizý boiynsha júrgizip jatqan jumystary týraly aqparat berildi.
"Báiterek" UBH basqarma tóraǵasy Rýstam Qaraǵoishin azyq-túlik ónerkásibi kásiporyndarynyń ainalym kapitalyn qarjylandyrý baǵdarlamasyn ázirleý barysy týraly baiandady, onyń aiasynda otandyq taýar óndirýshilerge AÓK-degi óńdeýshilerge taýarlyq nesie berý jáne faktoring siiaqty qysqamerzimdi saýda qarjylandyrý quraldary usynylady. Bul sharalar jumys istep turǵan óndiristerdiń ainalym kapitalyn kóbeitýge múmkindik beredi ári jańa kásiporyndar ashýǵa jaǵdai jasaidy.
Holdingtiń enshiles qurylymy – "Agrarlyq nesie korporatsiiasy" AQ ósimdik sharýashylyǵyn qoldaýǵa baǵyttalǵan "Syiaqy mólsherlemesin bólý" pilottyq jobasyn iske qosty. Sharýalarǵa jeńildikpen qarjy beriledi, bul rette mólsherleme biýdjet qarajaty emes, taýar jetkizýshiler esebinen sýbsidiialanady. "FOODGRAIN" JShS oń nátije oń kórsetse, jobanyń el boiynsha taralý aýqymyn keńeitý josparlanýda.
Qurylys materialdarynyń otandyq onlain platformasyn material.kz taýar birjalarymen integratsiialaý máselesi pysyqtalýda, bul qurylys materialdary naryǵynda baǵa belgileýdiń ashyqtyǵyn arttyrýǵa múmkindik beredi. Platformada 217 otandyq qurylys materialdaryn óndirýshi men jetkizýshi tirkelgen, 614 taýar sanaty ornalastyrylǵan.
"Báiterek" UBH tarapynan kórsetiletin biznesti qoldaý sharalary sheńberinde qarjylandyrý somasynyń keminde 30% mólsherinde otandyq taýarlar men qyzmetterdi satyp alý negizgi ólshem bolyp sanalatyn jobalarda el ishindegi qundylyqty saqtaý boiynsha ózara mindettemeler qarastyrylǵan. Úkimet basshysy Oljas Bektenov bul shekti kórsetkishti arttyrý maqsatynda qaita qaraýdy tapsyrdy.
"Jaqynda men Úkimet otyrysynda Ekonomikalyq patriotizm saiasatyn ustanatynymyzdy aittym. Memlekettik damý institýttary esebinen qarjylandyrylatyn jobalardaǵy elishilik qundylyqtyń úlesi edáýir joǵary bolýǵa tiis. Árbir jobany taldap, memlekettik qoldaý alýshylarǵa tek qana qazaqstandyq óndiristiń jabdyqtaryn, materialdaryn, basqa da taýarlaryn satyp alý boiynsha mindettemeler qoiý qajet", — dep atap ótti Oljas Bektenov.
Úkimet basshysy holding basshylyǵyna jáne beiindi ministrlikterge otandyq taýar óndirýshilerdi qoldaýdyń qoldanystaǵy quraldarynyń tiimdiligin arttyrýdy, olar týraly biznesti aqparattandyrý jónindegi jumysty kúsheitýdi tapsyrdy.
Keńes qorytyndysy boiynsha "Báiterek" UBH AQ-nyń 2023 jylǵy jyldyq esebi, 2014-2023 jyldarǵa arnalǵan damý josparynyń oryndalýy jónindegi esebi jáne basqa da birqatar qujattar bekitildi.
Anyqtama: "Báiterek" UBH qurylymdyq bólimsheleri bir jarym jyl ishinde otandyq óndirýshilerge 1,2 trln teńgege qoldaý kórsetti. Lizingtik qarjylandyrý aiasynda qazaqstandyq 27 óndirýshige qoldaý kórsetilip, 677,5 mlrd teńgege 22 myńǵa jýyq kólik tehnikasy satyldy. Qazaqstannyń Damý banki jelisi boiynsha taýarlardy, jumystar men qyzmetterdi satyp alýdyń jalpy kólemi 181,2 mlrd teńgeni qurady, onyń ishinde otandyq óndirýshilerdiń úlesi – 106,3 mlrd teńge. Eksporttyq-kredittik agenttiktiń qabyldanǵan mindettemeleriniń kólemi 466,9 mlrd teńgeni, eksporttyq túsim – 860 mlrd teńgeni qurady. "Qazaqstan Investment Corporation" AQ 26 mlrd teńgege 9 jobaǵa qoldaý kórsetti.
