Qoǵamnyń bolashaǵy tek ekonomikalyq kórsetkishtermen nemese tehnologiialyq jetistiktermen ólshenbeidi. Eldiń erteńi eń aldymen azamattardyń bilimine, eńbekqorlyǵyna, jaýapkershiligine jáne qundylyqtaryna bailanysty. Prezident Qasym-Jomart Toqaev Tamyz konferentsiiasynda óskeleń urpaq tárbiesine toqtalyp, ustazdar «oiy taza, nieti túzý, jaqsylyqqa, jarqyn bolashaqqa degen senimi zor jigerli azamattardy» tárbieleýge tiis ekenin atap ótti, dep habarlaidy dalanews.kz.
Bul ustanym qazirgi qoǵam úshin erekshe mánge ie. Aqparat aǵyny kúsheiip, áleýmettik jeliler adamnyń dúnietanymyna tikelei yqpal etip otyrǵan kezeńde jastardyń jaqsy men jamandy, aqiqat pen jalǵandy ajyrata bilýi mańyzdy. Memleket basshysy osy turǵyda qoǵam ańyzdarǵa emes, shynaiylyqqa arqa súieýi kerektigin, al «aýyzymen oraq orǵandar emes, istiń adamy» baǵalanýy qajet ekenin aitqan. Onyń paiymynsha, jasampazdyq pen eńbek qana qoǵamdy alǵa bastyrady.
Oi tazalyǵy men durys niet kúndelikti áreketten kórinedi. Zańdy qurmetteý, adal eńbek etý, bilimge umtylý, qorshaǵan ortaǵa jaýapkershilikpen qaraý, ózgeniń eńbegin baǵalaý – osy qundylyqtardyń naqty kórinisi. Prezident buǵan deiin Ádiletti Qazaqstandy qurý úshin saiasi jáne ekonomikalyq reformalarmen qatar qoǵamdyq sana men azamattardyń nieti ózgerýi qajet ekenin atap ótken. Sondai-aq otanshyldyq, bilimpazdyq, eńbekqorlyq, tártip, adaldyq pen ádildikti «Adal azamat» tujyrymdamasynyń negizgi qasietteri retinde ataǵan.
Mundai dúnietanym ásirese jas býyn úshin mańyzdy. Únemi sátsizdikti izdeý nemese bolashaqqa kúmánmen qaraýdyń ornyna bilim alyp, jańa daǵdylardy igerip, naqty nátijege umtylý qoǵamdaǵy jasampazdyq mádenietin kúsheitedi. Toqaev Qazaqstan jastarynyń jaqsylyqqa umtylyp, eldiń keleshegine senimmen qaraitynyn atap ótip, otanshyl, bilimpaz, jańashyl, talapty jáne eńbekqor adamdar eldiń kóshin alǵa bastaitynyn aitty.
Sondyqtan «Oiy taza, nieti durystyń bolashaǵy da jarqyn» qaǵidasyn tek tárbielik uran retinde emes, qoǵam damýynyń qundylyqtyq baǵdary retinde qarastyrýǵa bolady. Adal eńbek etetin, bilimge umtylatyn, zań men tártipti qurmetteitin jáne óz bolashaǵyna senetin azamattardyń kóbeiýi eldiń de múmkindigin keńeitedi. Jarqyn bolashaqqa senim osyndai kúndelikti naqty áreketterden qalyptasady.
