Al qazaq tilinde qyzmet bere almaǵanymen qoimai, kúzetshilerdiń kúshimen ony qýyp shyqqan bank basshylyǵy bul isterine ókinetindikterin aityp, keshirim surady. Bul daýly máselede zańgerler de til janashyrynyń jaǵyna shyǵyp otyr.
Bul týraly Eýraziia birinshi arnasy habarlady.
Túrik azamaty bar qarajatyn jinaqtap, osy bankte saqtaýǵa bel býǵan. Qarjy institýtyn tańdaýda da ózindik ustanymy bar eken.
Biraq, bank qyzmetkerleri, tipti bólimshe basshysy da qazaq tilinde qyzmet kórsetpek túgili kúzetshilerdiń kúshimen klientti ǵimarattan qýyp shyǵypty.
«Esepshot ashý maqsatynda bir kún buryn jelide, odan qalsa dostarymnan suraǵan edim. Qandai bankti tańdaýǵa keńes beresizder dep. Túrli pikir aityldy. Al men Qazkommertsbankti tańdadym. Tańdaý sebebim, mynadai. Banktiń atynda «qaz» degen sóz bar dep. Qazaqtyń aty bar dep, ádeii sol bankti tańdadym», – deidi jýrnalist Oǵyz Doǵan.
Til janashyrynyń aitýynsha, alǵash kezikken qyzmetker ózin ózge ulttyń ókili retinde tanystyryp, bul tilde sóileýge mindetti emes ekendigin alǵa tartqan.
Biraq, keiin onyń bárin joqqa shyǵaryp, videoúndeý túrinde keshirim surady. Ókinishke orai, taǵy da resmi tilde emes.
«Astanadaǵy bank bólimshesinde bolǵan jaitqa qatysty keshirim suraǵymyz keledi. Onda tutynýshyǵa qyzmet kórsetý erejesi saqtalmaǵan. Bul oqiǵa bizge úlken sabaq boldy. Sondyqtan, óz tarapymyzdan qyzmet kórsetý sapasyn arttyratyn bolamyz», – dedi banktiń basqarma tóraǵasy Ýlf Vokýrka.
Túrik azamatynyń áreketin zańǵa salyp, qai qyrynan alsa da durys, deidi zańgerler. Qyzmetti memlekettik tilde talap etýi zańdy. Sondai-aq, bankti kameraǵa túsirýge tyiym salatyn bizde eshbir zań joq ekendigin aitady.
«Qazaq tilinde sóileýin talap etkennen keiin, onyń nátijesi bolmaǵannan keiin árine dáleldeme retinde túsirip tur. Sol sebepti, onyń is-áreketinde zańǵa qaishy áreket joq. Nege? Óitkeni, ol azamat beinetaspaǵa túsirmegen bolsa, ol ózi jeke bolǵandyqtan, keiinnen ony dáleldeýde qiyndyqtar týyndaityn edi» – deidi zańger Jandos Tuiaqov.
Til úshin kúresip júrgen sheteldik azamat byltyr otandyq áýe kompaniiasynyń qyzmetkerlerin de sabasyna túsirgeni edi. Al onyń kezekti jeńisin otandastarymyz úlgi etýge turarlyq dep baǵa berýde. Osy beinejazbanyń izinshe ǵalamtorǵa til máselesin qaýzaǵan taǵy bir material jariialandy.
«Biz Qazaqstanda turyp, tek qana qazaqsha qyzmet alǵymyz keledi. Masqara. Osy sender siiaqtylar bárin qurtady. Ne mynaý?», – degen Oǵyz Doǵan.
Qazir Qazaqstanda túrik tilinde «Alashorda» jaiynda kitap jazyp júrgen Oǵyz Doǵan árbir adam óz quqyqtaryn osylaisha qorǵai bilýi kerek, deidi. Ári ózine ádiletsizdik tanytqandarǵa keshirim jasaǵan. Biraq, sol kúni bólimshege alyp barǵan 4 mln teńgesin endi ózge banktiń shotynda saqtaityn bolypty.
https://www.youtube.com/watch?v=TepTa7FYYXw
