Almaty oblysynda kámeletke tolmaǵan qyzǵa qatysty jynystyq sıpattaǵy zorlyq-zombylyq deregi boıynsha is aıaqtaldy. Ógeı qyzyn tórt jyl boıy zorlaǵan áke ómir boıy bas bostandyǵynan aıyryldy dep habarlaıdy Dalanews.kz.
Zardap shekken qyzdyń anasy ekinshi kúıeýimen birge ómir súre bastaǵan kezde, jábirlenýshi qyz tórt jasta ǵana edi.
Anasynyń aıtýy boıynsha, birneshe jyldan keıin ekinshi bala dúnıege keldi, alaıda otbasylyq ómir qıyndyqtarǵa toly boldy. Áıeldiń aıtýynsha, kúıeýi araq iship, jıi qol kóteretin bolǵan. Qyzy 9 jasqa tolǵannan keıin, ógeı ákesi qyzǵa tıise bastady.
Áıel jumys istep, júrek aýrýyna baılanysty emdelip júrgen, sol sebepti úıde jıi bola bermeıtin.
«Sol kezde men qyzymnan ózgeristerdi baıqaı bastadym: onyń tábeti bolmaı, az uıyqtaıtyn. Keıde men ony tósektiń shetinde otyryp, tizesin qysyp, bir núktege qarap otyrǵanyn kóretinmin. Men ony kóp ret sóılesýge shaqyryp, ne bolǵanyn suradym. Ol árdaıym jaı ǵana sharshaǵanyn aıtatyn. Mektepte de ózgerister baıqaldy. Muǵalim meni shaqyryp, qyzym jıi esinen tanatynyn aıtty», – dep eske alady anasy.
Bolyp jatqan jaǵdaıdy eshkimge aıtpasyn dep, ógeı ákesi qyzdy qorqytyp kelgen: ol ananyń aýrýyn alǵa tartyp, tipti óltiremin dep te qoqan-loqqy jasaǵan. Ananyń aıtýynsha, ol qyzǵa: «Eger muny anańa aıtsań, onyń júregi aýyrady, ol sen úshin óledi», «Bireýge aıtsań, anańdy atyp tastaımyn/uryp óltiremin» degen sózdermen qysym kórsetken. Anasynyń ómirin qorǵaýǵa tyrysqan qyz úndemeı júrgen.
Tek 2025 jyldyń basynda qyz ógeı ákesi ne istep júrgenin aıtýǵa bel býyp, aldymen tátecine, keıin anasyna mán- jaıdy aıtqan edi.
Áıel dereý aýdandyq ishki ister bólimine aryz jazyp, qyzdy saraptamaǵa alyp ketti. Tergeý bastaldy, al keıin is sotqa jiberildi.
Sot talqylaýlary shamamen tórt aıǵa sozyldy. 26 qarashada sot sheshim shyǵardy.
«Sottalýshy QK-niń 121-babynyń 4-bólimi boıynsha «Jynystyq sıpattaǵy zorlyq áreketter» úshin ómirlik bas bostandyǵynan aıyryldy. Sondaı-aq, ol qyzǵa materıaldyq jáne moraldyq zıan retinde 5 mıllıon teńge tóleýi tıis», – dedi Human Rights Lawyers qorynyń prezıdenti, Adilzange zań keńesshileri palatasynyń múshesi Lázzat Rakısheva.
