Kún tártibi boiynsha «Túrkistan oblysy agroónerkásip kesheniniń 2017-2021 jyldardaǵy (AÓK) damý baǵdarlamasynyń» 2018 jyldyń 6 aiynyń qorytyndysyn jasaǵan oblystyq aýyl sharýashylyǵy basqarmasynyń basshysy Serik Turbekov saladaǵy atqarylǵan isterge toqtaldy.
2018 jyldyń I jarty jyldyǵynda jetken saladaǵy ózge de jumystardy baiandaǵan S.Turbekovke aimaq basshysy sońǵy ákimshilik aýmaqtyq ózgeristerge bailanysty Agroónerkásip keshenin damytýda qandai baǵyttarǵa basymdyq beriletinin surady. Oblystaǵy jasyl beldeý aimaǵyn ulǵaityp, mal sharýashylyǵy salasy men tamshylatyp sýǵarý júiesin myqtap qolǵa alý qajet degen basqarma basshysynyń jaýabyna qanaǵattanbaǵan ákim jan-jaqtan ǵalymdardy shaqyryp, keshendi tujyrymdama jasamasa, saladaǵy jumystardyń aqsaitynyna alańdaýshylyq bildirdi.
"Birinshi kezekte oblystyń ekonomikalyq draiveri bolyp aýyl sharýashylyǵy salasy tabylady. Sondyqtan 1 ai merzimde árbir aýdan kesindisinde aýyl sharýashylyǵyn damytýdyń keshendi josparyn ázirleýdi tapsyramyn. Sonymen birge, sala boiynsha Úkimet bekitip bergen indikatorlardyń oryndalýy qatań baqylaýǵa alynsyn", - dedi J.Túimebaev.
Basqosýda osy syndy ózge de tapsyrmalar júktegen oblys basshysy sý sharýashylyǵy nysandarynyń da respýblikalyq menshikke ótkizý jumystaryn jedeldetýdi mindettedi. Sondai-aq, aq altyndy aimaq sanalatyn óńirimizde maqta ziiankesterimen kúresýge bólinetin preparattardyń sharýalarǵa jetkizilýin qamtamasyz etý máselesin retteýdi tapsyrdy.
Túrkistan oblysy ákiminiń baspasóz qyzmeti
