Qyzylorda oblysynyń ákimi Nurlybek Nálibaev, Parlament Senatynyń depýtaty Naýryzbai Baiqadamov, oblys prokýrory Rizabek Ojarov pen oblystyq máslihattyń tóraǵasy Murat Tileýmbetov, «Petro Qazaqstan Qumkól Resorsiz» AQ vitse-prezidenti Serik Qojaniiazov,ziialy qaýym ókilderi men ardagerler Aral aýdandyq kópbeiindi ortalyq aýrýhanasynyń 25 tósektik juqpaly aýrýlar bólimshesiniń ashylý saltanatyna qatysty, dep habarlaidy Dalanews.kz
Aimaq basshysy saladaǵy jańashyldyqtarǵa, halyqqa meditsinalyq qyzmet kórsetý sapasyn jaqsartýda atqarylǵan jumystarǵa toqtaldy.
«Prezidentimiz «Densaýlyq saqtaý júiesin damytý, eń aldymen, azamattardyń ál-aýqatyn kóterýge baǵyttalǵan. Óitkeni meditsinanyń deńgeii men qoljetimdiligi – elimizdegi ómir sapasynyń negizgi kórsetkishi», – degen bolatyn.
Memleket basshymyzdyń tapsyrmasymen, Úkimettiń qoldaýymen densaýlyq saqtaý salasyn damytýǵa, halyqtyń meditsinalyq qyzmetterge qoljetimdiligin arttyrýǵa baǵyttalǵan keshendi sharalar nátijeli júzege asýda.
Ult saýlyǵy – memleketimizdiń negizgi kapitaly desek, baǵa jetpes qazynany qyzǵyshtai qoryp júrgen meditsina salasy qyzmetkerleriniń adal isin joǵary baǵalaimyz, árdaiym qurmetpen qaraimyz.
El igiligine tabystalatyn juqpaly aýrýlar bóliminiń jańa ǵimaraty, ondaǵy dárigerler naýqastyń dertine daýa, kóńiline raýan berip, halyq yqylasyna bólenedi dep senemiz», – dedi N.Nálibaev.
Saltanatty jiynda aýdannyń ósip-órkendeýine úles qosqan meditsina salasynyń qyzmetkerleri menmerdiger mekemeniń qurylysshylary oblys ákiminiń Alǵys hatymen marapattaldy. Naýryzbai Baiqadamov, Rizabek Ojarov quttyqtaý sóz sóilep, jańa nysannyń ashylýymen quttyqtady.
Juqpaly aýrýlar bólimshesiniń qurylysy qaitarylǵan aktivter esebinen 2,3 mlrd teńgege qarjylandyryldy. Oǵan qosa aýdandyq aýrýhana janynan «Aýylda densaýlyq saqtaýdy jańǵyrtý» ulttyq jobasy aiasynda kardiologiia jáne insýlt bólimsheleri ornalasqan qosymsha qurylys aiaqtalyp, halyq igiligine berildi. Oǵan da qaitarylǵan aktivter esebinen 2,1 mlrd teńge bólindi.
Keiingi ýaqytta 206 mln teńgege qural-jabdyqtar alynyp, aýrýhananyń materialdyq-tehnikalyq bazasy nyǵaityldy. Endi aýdan turǵyndary oblys ortalyǵyna nemese basqa qalalarǵa sabylmai, syrqattanǵandarǵa mamandandyrylǵan kómek kórsetý úshin ashylǵan jergilikti jerdegi bólimshede tolyqqandy em alady.
Aita keteiik, sońǵy úsh jylda oblystyń densaýlyq saqtaý salasyna 450 mlrd. 100 mln. teńge qarjy bólinip, halyqtyń suranysyna sáikes túitkildi máseleler sheshimin taýyp keledi. «Aýylda densaýlyq saqtaýdy jańǵyrtý» ulttyq jobasy aiasynda barlyq aýdanda 28 meditsinalyq nysan salyndy.
Qyzylorda qalasynda 300 oryndyq kópbeiindi aýrýhana boi kóterýde, 4 aýdandaǵy ortalyq aýrýhanalar janynan qosymsha ǵimarattar ashyldy.
Ótken jyly Shieli aýdanynda juqpaly aýrýlar bólimshesiniń jańa ǵimaraty el igiligine tabystalǵan bolatyn. Qyzylorda qalasynan 200 oryndyq perinataldyq ortalyq pen 500 oryndyq emhana salýǵa Úkimet tiisti qaýly qabyldady. Jaqyn kúnderi qurylysy bastalady. Budan bólek, 400 oryndyq emhananyń da irgetasy qalanady.
Turǵyndar suranysyna sáikes sońǵy eki jylda jergilikti biýdjet qarjysyna 225 jańa sanitarlyq avtokólik, 45 jedel járdem kóligi alynyp, paidalanýǵa berildi. Barlyq eldi mekendegi densaýlyq saqtaý mekemeleri arnaiy qyzmettik avtokólikpen 100 paiyz qamtamasyz etildi.
Keiingi jyldary 24 meditsinalyq nysan kúrdeli jóndeýden ótkizildi, 15 mlrd. teńgege meditsinalyq qural-jabdyqtar satyp alyndy. Jabdyqtalý deńgeii 2022 jyly 83,2 paiyz bolsa, búginde bul kórsetkish 90,2 paiyzǵa jetti.
