Halyq pen biliktiń arasynda bailanys joq, bir-birinen alshaqtap ketti dep aiyptap jatady. Solai bolsa, siz qai jaqtasyz? Eger halyq jaǵyndamyn deseńiz, halyqqa qatysty taǵdyrly máselelerge aralastyńyz ba?
– Bailanys joq dep aitý artyq bolar, biraz halyq pen biliktiń arasy alshaqtap bara jatqanyn amalsyz moiyndaýǵa týra keledi. Ony el ómirine zer salyp, halyqpen kezdesip júrgender, táýelsiz basylymdardy qadaǵalaityndar ańǵarady. Bilik qoǵamdaǵy kúrdeli problemalardy aitýǵa múddeli emes. Tek jaqsylyqty aityp, eldi tynyshtandyrǵysy keledi. Biraq odan halyqtyń jaǵdaiy jaqsarmaidy. Barlyq jerde halyq óz múddesi úshin kúresý arqyly ǵana bilikti kóndire alady.
Qazir halyqqa qarap, aqylsyz balaǵa aqyl úiretkendei uialtyp sóilep, ustazdyq jasaýdyń qajeti joq. Syrtta HIH ǵasyr emes, HHI ǵasyr. Halyqtyń bizden uialatyn jóni joq, biz halyqtyń aldynda uialýymyz kerek. Qazaqtyń múddesin qorǵap, bilikke batyryp sóz aita almai júrgenimiz úshin, shyndyq úshin shyryldaýdyń ornyna, basshylarǵa bas uryp, jaýyrdy jaba toqyp júrgenimiz úshin, sol úshin dáme etpes dáme etetinimiz úshin, taǵy sol siiaqty…
Men prezident ákimshiliginde jumys istemeimin. Onda isteitin, men biletin jigitterdiń ishinde elge jany ashityn azamattar joq dep aita almaimyn. Qazaq ultynyń azattyǵy úshin mert bolǵan Alashtyń azamattaryna arnalǵan, aqshasy bólingen, maketi daiyn eskertkishti Astanada ornatý týraly usynysyn ótkize almai: “Mynadai iske shamamyz kelmese, bul arada neǵyp júrmiz”, – dep kúizelgen jigitti bilemin. Biraq olardyń qolynda úlken tizgin joq.
– Siz ótken jolǵy bir áńgimeńizde: “Mynaý sumdyq boldy, elimizdi buryn-sońdy bolmaǵan jaǵympazdyq derti jailap barady”, – degen edińiz. Kimderge qarap túńildińiz?
– Bul mensiz de aitylyp júrgen belgili áńgime ǵoi. Muhtar Shahanovtyń úlken qoǵamdyq problemalardy kótergen “Qyrǵyz everesi” atty kitaby jaryq kórdi. Sonyń ishinde Ortalyq Aziia elderindegi jeke basqa tabyný, jaǵympazdyq sekildi keleńsizdikterge arnalǵan taraý bar. Sonda túrikmenbashy Saparmurat Niiazovty qudaiǵa teńep óleń shyǵarǵan aqyn týraly sóz boldy. Árine, kezinde buǵan kóbimiz kúlgen bolatynbyz. Biraq kóp uzamai ózimizdiń de basymyzǵa keletinin baiqamappyz.
Ministrler men oblys basshylaryn bylai qoiǵanda, mekemeniń direktorlaryna sheiin “Prezidenttiń tapsyrmasy boiynsha” demei, sóz qozǵamaityn boldy. Prezident tikelei tapsyrma bermese, túk istemei otyratyn sekildi. Maqala jazsa boldy, memleket basshysy kókke kóterip maqtaý normaǵa ainaldy. Sál-pál bolsa da yńǵaisyzdaný degen joq. Árine, basshyny synaǵannan góri, onyń maqtaý tiimdi. Bul arada prezidenttiń óz basy týraly áńgime joq. Áńgime qoǵamdaǵy etika jaiynda. “Meshkei degen jaqsy at emes” degen sóz bar. Al jaǵympaz odan asqan jaǵymsyz.
… Órkenietti elderde memleket basshysyna ashyqtan ashyq jaǵympazdaný, maqtaý úrdisi joq. Internetke qansha úńilsem de, Obamany, Sarkozidi, Merkeldi, tipti, bizge jaqyn Resei prezidentin qudaiǵa, paiǵambarǵa teńegen roman, poema jazǵan belgili aqyn-jazýshylardy kezdestirmeppin.
Bul aýrý qoǵamdy ilgeri bastyrmaidy, álemdik qaýymdastyq aldynda bedelimizdi túsiredi, kúlki qylady. Osy arada prezidenttiń: “Aý, aǵaiyn, qoiyńdar, meni uiatqa qaldyrmańdar”, – degen bir aýyz sózi kerek siiaqty.
