Áleýmettik jelide qoǵam belsendisi Mira Baibek elitalyq mektepterge qabyldaý júiesine qatysty pikir bildirip, qyzý talqylaý týǵyzdy, dep habarlaidy dalanews.kz.
Onyń jazbasy NZM, RFMSh jáne BIL sekildi mamandandyrylǵan mektepterge oqýshy daiyndaityn aqyly ortalyqtardyń jumysyna qatysty máseleni qaita kóterdi.
Mira Baibektiń pikirinshe, búginde daryndy balalardy anyqtaý júiesi teń múmkindikter qaǵidatynan alystap barady.
Ol óz jazbasynda:
«NZM, RFMSh, BIL siiaqty mańdaialdy mektepterge bala daiyndaityn búkil ortalyqtardy jaýyp tastaý kerek. Tek mekteptiń negizgi bilimin jaqsy meńgergenderdi ǵana konkýrspen qabyldaǵan durys. Jai mektepter men muǵalimniń sapasy sonda ǵana ósedi. Qas júirik sonda ǵana tanylady», – dep jazdy.
Onyń aitýynsha, aqyly daiyndyq kýrstary elitalyq mektepterge túsý múmkindigin kóbine qarjylyq jaǵdaiy jaqsy otbasylardyń balalaryna jaqyndatyp otyr.
«Bolsa da, bolmasa da súirelep, oqý ortalyqtaryna milliondap aqsha quiyp, túsirip alyp, qanshama jaǵdaiy joq daryndy balalardyń jolyn kesip jatyr», – deidi avtor.
Bul pikir áleýmettik jelilerde ekige bólingen reaktsiia týǵyzdy.
Bir tarap shynymen de daiyndyq indýstriiasy sońǵy jyldary úlken bizneske ainalǵanyn aitady. NZM, RFMSh jáne BIL emtihandaryna arnaiy daiyndyq kýrstary birneshe aidan birneshe jylǵa deiin jalǵasady. Keibir ata analar balasyn bastaýysh synyptan bastap daiyndaidy.
Mira Baibek osy máselege toqtalyp:
«Aqshaǵa balasyn daiyndaǵyshtar odan da NISh pen RFMSh dan aqyly bólim ashqyzyp sonda oqytsyn. Sonda ádiletti bolady, ádilet izdeseńder», – dep jazǵan.
Taǵy bir mańyzdy másele retinde ol qysqa merzimdi daiyndyqtyń ádildigine kúmán keltirgen.
«Alty aida daiyndai salyp, myqty mektepterge túse qalý da ádiletti emes qoi, shynyǵynda. Nebir daryndy balalardyń aqsha joqtyqtan saǵy synyp jatyr», – deidi ol.
Avtordyń pikirinshe, qarjysy joq, biraq tabiǵi qabileti joǵary balalar kóleńkede qalyp qoiýy múmkin.
«Bolmysynan júirik, tabiǵatynan talant balalar sonda tabylar edi. Áitpese mynaý ne endi, shamasy jetkenniń ǵana qulaqty jarǵan daýysy shyǵady», – dep jazdy qoǵam belsendisi.
Jazba sońynda ol:
«Báribir jetektegen tazy túlki almaidy», – degen pikir qaldyrǵan.
Bul másele Qazaqstan qoǵamynda jańa emes. Sońǵy jyldary elitalyq mektepterge daiyndyq ortalyqtarynyń kóbeiýi birneshe ret talqylanǵan. Bir tarap muny balanyń múmkindigin arttyratyn qural dep eseptese, ekinshi tarap áleýmettik teńsizdikti kúsheitetin faktor retinde qaraidy.
Sarapshylardyń bir bóligi másele daiyndyq ortalyqtarynda emes, qarapaiym mektepter arasyndaǵy bilim sapasynyń aiyrmashylyǵynda dep sanaidy. Sebebi ata analar qosymsha daiyndyqqa kóbine mektep baǵdarlamasy jetkiliksiz dep eseptegen jaǵdaida júginedi.
Al endi bir pikir boiynsha, eger aýyl men qala, qarapaiym mektep pen mamandandyrylǵan bilim uiymdary arasyndaǵy alshaqtyq azaisa, daiyndyq indýstriiasyna suranys ta tómendeýi múmkin.
Qazir áleýmettik jelide basty suraq bireý: elitalyq mektepterge kim túsýi kerek – aqyly daiyndyqtan ótken oqýshy ma, álde tabiǵi qabiletimen erekshelengen bala ma? Bul pikirtalas aldaǵy ýaqytta da jalǵasýy múmkin.
