Ulttyń maqsat-múddesin kózdeidi degen «Qazaqstan» arnasy Qairattyń qol-aiaǵyn jerge tigizgen joq. Olar bul kontsert «Jyldyń basty oqiǵasy» dep pátýa shyǵaryp, barsha halyqtyń Astana men Almatyǵa jinalýy kerektigin tań atyp, kesh batqansha jarnamalaýmen boldy.
Quddy «Qazaqstan» arnasynyń Qairat Nurtastyń kontsertinen basqa jumysy joq siiaqty.
Nesin jasyramyz, sońǵy ýaqyttary «Qazaqstan» arnasy Ulttyq telearnadan góri úlken prodiýserlik ortalyqqa ainalyp ketti ǵoi. «Juldyzdar fabrikasy» degen durys shyǵar. Mundai sumdyq jarnamadan keiin qalaisha kontsertke kelmeisiń. Jarnamanyń arbaýyna túsken jastarymyz baryn kiip, baqanyn qolyna alyp Astana men Almatyǵa aǵyldy.
Birden aitaiyq, Reseidegi kóp ánshilerdiń biri sanalatyn Timati men Niýshaǵa talantty ánshimiz Qairat Nurtastyń jigi-japar bolǵany bizge unaǵan joq. Orystyń eki ánshisi bolmasa jurt kontsertke kelmei qoiatyn ba edi? Shyny kerek, kontsertti uiymdastyrýshylardyń basynda osyndai kúmán-kúdik bolǵan siiaqty.
Osydan 10 jyl buryn orys ánshileri qazaq ánshilerimen dýet aitýǵa arlanýshy edi. Olar qazaq ánshilerimen qosylyp án aityp, deńgeiin túsirmeýge tyrysatyn. Al qazir jaǵdai ózgerdi. Kún ótken saiyn Qazaqstan tabiǵi túrde damyp, jeke memleket retinde álemdegi ornyn aiqyndap keledi.
Al bizdiń ánshi-ártister óziniń qandai elde turatynyn túsinbeýde. Ánshilerimiz orys ánshilerimen qosaqtalyp, sahnaǵa shyǵýǵa qumar. Jai shyǵyp, án aitsa bir sári.
Kontsert bastalmai jatyp, álgi orys ánshisimen qosylyp án aitatynyn, bolashaqta birigip án jazatynyn (keide bul armandary oryndalmai qalady) aityp, gazet-jýrnalǵa suhbat berip, ózin barynsha tómendetip, orys ánshilerin barynsha joǵarylatyp kórsetetin ádet qalyptasty. Bul qazaq ánshileri arasynda úrdiske ainalyp barady.
Birshama jyl buryn qazaq jastary Almatyda ótken kontsertte Qairattyń ánin tyńdaimyz dep, sońynda uiymdastyrýshylardyń kesirinen shý shyǵyp, beikúná jastarymyz qoǵamdyq tártipti buzýshy retinde, temir torǵa qamalǵany esimizde.
Sol kezde bizder qazaqtildi tyńdarmandardyń Qairat Nurtastyń shyǵarmashylyǵyn qanshalyqty joǵary baǵalaitynyn baiqap, tánti boldyq. Sol bir shýdan keiin Qairat Nurtastyń da joly «bolyńqyramai» biraz ýaqyt qiyn jaǵdaidy bastan ótkerdi. Biraq júzdegen myń qazaqtildi tyńdarmannyń arqasynda Qairat kóleńkede qalyp qoiǵan joq. Juldyzy jarqyrap, kún ótken saiyn abyroiy asqaqtady.
Ókinishke orai, Qairat baýyrymyz qazaqtildi aýditoriiasyna adaldyq tanyta almady. Kúni keshe ǵana ótken kontsertinde orys ánshilerin tóbemizge shyǵaryp, solardyń qolbalasyna ainalyp, kópshilikti ári-sári kúige túsirdi.
Aqsha úshin Sailaýbekpen qosylyp án aitýǵa daiyn Timatige Qairattyń jalpaqtaýy orynsyz boldy. Sailaýbek pen Timati, Abai Begei men Timati qosylyp án aitsa túsiner edik. Al Qairattyń orys ánshilerge bas iip, muqtajdyq tanytýyn aqylǵa jeńdire almai-aq qoidyq. Óitkeni Qairat Qazaqstannyń eń talantty ánshisi.
Qalyń qazaqqa aiaýly ánshiniń orys ánshilerine jalpaqtaýy óte orynsyz. Qairat Nurtas Timati men Niýshasyz da aýditoriia jinaityn talantty ánshi edi. Talantty ánshiniń jónsiz úrdiske erip, deńgeiin tómendetýi kimge kerek? Esińizde bolsa, Astanada ótken «MÝZ-TV 2015. Gravitatsiia» sharasyn qazaqtildi orta orystardyń «mádeni ekspansiiasy» dep baǵalap, qazaq ánshileri saýal tastaǵanda «MýzART» tobynyń atynan Sáken Maiǵaziev feisbýktegi paraqshasynda ne dep edi. Eske alaiyqshy.
Elin súigen azamattyń oiy. «MýzART» «Gravitatsiia» baiqaýyna qatyspady dep tyńdarmandar odan teris ainalǵan joq qoi. Qaita «MýzART»-qa degen eldiń yqylasy arta túskenine kýá boldyq. Iá, bizdiń saýyqshyl jurt Qairat Nurtas orys ánshilerin kontsertine qurmetti qonaq retinde shaqyrypty dep odan da teris ainalyp ketpeitinin bilemiz.
Eń jamany qazaq ánshileriniń óz ortanqol orys ánshilerin kontsertine shaqyryp, aýditoriia jinaý úrdisine Qairat Nurtastyń qoldaý tanytqany kóńilimizge qaiaý salǵanyn aitqymyz keldi.
Nurlan ÁÝBÁKIR
