Qazaqstannyń halyq ártisi, teatr jáne kino akteri ári rejisser Doshan Joljaqsynov 75 jas mereitoiyn atap ótti. Óner iesiniń qýanyshyna elge belgili mádeniet ókilderimen qatar, kezinde joǵary laýazymdy qyzmet atqarǵan memleket jáne qoǵam qairatkerleri jinaldy, dep habarlaidy dalanews.kz.
Áleýmettik jelide taraǵan mereitoi videolarynan kesh qonaqtarynyń arasynda Qazaqstannyń Reseidegi burynǵy elshisi Imanǵali Tasmaǵambetov, burynǵy memlekettik hatshy Qyrymbek Kósherbaev, aǵaiyndy Nurlan jáne Erlan Nyǵmatýlinder bolǵanyn kórýge bolady.
Sondai-aq mereitoiǵa burynǵy eńbek jáne halyqty áleýmettik qorǵaý ministri Tamara Dúisenova, Prezident ákimshiligi basshysynyń burynǵy orynbasary Darhan Qaletaev, eks-senator Qýanysh Sultanov jáne Almaty oblysynyń burynǵy ákimi Amandyq Batalov qatysqan.
Prezident quttyqtaýyn ákim jetkizdi
Buǵan deiin Prezident Qasym-Jomart Toqaev Doshan Joljaqsynovty 75 jasqa tolýymen quttyqtaǵan. Memleket basshysynyń quttyqtaýyn Almaty ákimi Darhan Satybaldy óner iesine tabystady.
"Siz saliqaly ǵumyryńyzdy ult rýhaniiatyn ulyqtaýǵa arnap, úzdiksiz shyǵarmashylyq izdenisterińiz arqyly zor jetistikke qol jetkizdińiz. Dástúr sabaqtastyǵyn saqtap, izbasar shákirtterińizdi tárbielep kelesiz", – delingen Prezident quttyqtaýynda.
Darhan Satybaldy mereitoi iesine myqty densaýlyq, uzaq ǵumyr, otbasyna amandyq jáne jańa shyǵarmashylyq tabys tiledi.
Aita keteiik, Doshan Joljaqsynov teatr men kinoda kóptegen beine somdap, keiin rejisser retinde de ózindik qoltańbasyn qalyptastyrdy. Ol "Daladaǵy qýǵyn", "Kóshpendiler", "Birjan sal" sekildi filmderdegi rólderimen kópshilikke tanyldy. Al "Birjan sal" jáne "Qunanbai" tarihi filmderin rejisser retinde túsirdi.
