Rejıser qansha halyqtyń yqylasyna bólense de, óz týyndylaryn kórgisi kelmeıtinin málimdedi.
– «Lıft» fılminiń montajdalǵan nusqasy daıyn boldy. Ony áli kórmedim, sebebi buǵan deıin fılmderdiń «shıki» nusqasyn kórgen kezde «osyny óshirip, eshkimge kórsetpeı-aq qoıaıyq» degenmin. Óz jumystarymdy kórgendi onsha unata bermeımin. Sebebi ózimdi ózim synap, «qap, myna jerde osylaı isteýim kerek edi» dep jıi aıtamyn. Osy jerde aıamaı-aq qoıýym kerek edi dep oılaısyń. Jalpy óz aqshańa túsirgen kezde barlyǵynyń qymbat ekenin túsinesiń. Máselen, 4 sekýndtyq kadr úshin 1500 dollarǵa kran shaqyrtqyń kelmeıdi. «Odan da sol kadr bolmaı-aq qoısyń, esesine únemdeısiń» deısiń de, fılm daıyn bolǵan kezde ókinip qalasyń, – dep aǵynan jaryldy kınorejısser.
Adambaı memleket tarapynan ulttyq kompanıalarǵa bólinetin aqsha óz qolyna tıse, álemge kórsetýge uıalmaıtyndaı kıno túsiretinin ashyna jetkizdi.
– Ulttyq kompanıalar halyqtyń suranysynda joq kınolardy túsirýge mıllıardtar jumsap jatqanyn bilgende eki ese ishiń ashıdy. Sebebi ondaı aqshaǵa álemge uıalmaı kórsetýge bolatyn kıno túsirýge bolady. Jalpy kıno – tabys alyp keletin nárse. Eger biz kıno salasyna búdjetten bólinip jatqan qyrýar qarjyny basqasha jumsaıtyn bolsaq, kreatıvti oı qosatyn bolsaq, qap… Jalpy kınoǵa ketken shyǵyn qaıtpaıdy dep oılaıtyn biz ǵana. Biraq shynyna kelgende memleket kıno arqyly aqsha taba alar edi. Bir fılmge 2 mıllıon, tipti 5 mıllıon dollar ból. Bul aqsha onsyz da bólinip jatyr. Sony álemdik prokatqa berip, Qytaıdan, Amerıkadan, Eýropadan aqsha jınap alýǵa bolar edi. Ol memlekettiń ımıjin qalyptastyrady. Sebebi kıno – ol ıntellektýaldyq eńbek, – dep túıindedi sózin Nurtas Adambaı.
Derekkózi: stan.kz
