Nurtas Adambaev ózi oiyn Qazaqstandaǵy kinematografiiany 2050 jylǵa deiin damytý kontseptsiiasy jobalaryn talqylaýǵa arnalǵan dóńgelek ústel barysynda málimdedi.
Timýr Bekmámbetov qazaqstandyq kinolarǵa amerikalyq kinolarmen básekelesý qiyn ekenin aitqan bolatyn. Onyń aitýynsha, eger de bilet baǵasy arzandaityn bolsa, halyq ta kinoǵa jiirek barady.
Al Adambaevtyń aitýynsha, qazaqstandyqtar sapaly ári jaqsy film úshin aqsha tóleýge daiyn. «Qazaqstandyqtar otandyq kinolardy súiip kóredi. Biz batys elderiniń jáne reseilik filmderdi kórip boldyq. Qazaqstandyq filmderge biletterdiń baǵasyn arzandatýdyń ornyna basqa da áreketterdi nege jasamasqa? Biýdjettegi qarajatty otandyq filmderdi túsirýge jumsaý kerek shyǵar. Jeke stýdiialarǵa kómek kórsetý kerek shyǵar?», – dedi Adambaev.
– Timýr otandyq filmderdiń biletteriniń baǵasy qansha turý kerek ekenin aitý úshin ózi qansha qazaqstandyq film túsirdi eken? Nege ol mundai usynysty reseilikterge aitpaidy. Qazaqstandyq kinolarǵa biletterdiń baǵasyn arzandatyp, biz ózimizdiń namysymyzǵa tiemiz. Osylaisha biz barsha jurtqa ózimizdiń otandyq ónimniń arzan ekenin kórsetemiz. Bekmámbetov kino rejisseri retinde kórermenge qyzyq bolatyndai film túsirýge qarajat jumsaýdyń qanshalyqty mańyzdy ekenin túsinýi kerek. Adamdar 100-200 teńgesin únemdep, sapasy onsha emes kinoǵa barady dep oilamaimyn. Jaqsy film bolyp jatsa, halyq barady. Jaman bolsa, barmaidy. Abonementter týraly aitatyn bolsam, ol bir qiyn kezeńderdi elestetedi, – dedi Adambaev.
Aita keteiik, osyǵan deiin Bekmámbetov otandyq kinolarǵa bilettiń baǵasyn arzandatýdy usynǵan bolatyn. «Qazirgi kezde kinoteatrlardaǵy biletterdiń baǵasy basty másele bolyp otyr. Menińshe, bilettiń baǵasy kinoǵa salynǵan investitsiiaǵa sáikes bolýy tiis. Qazir kinoǵa aqshasy bar adamdar barady. Sebebi 920 teńge turatyn bilet keibir otbasylarǵa qymbatqa túsýi múmkin», – dedi Timýr Bekmámbetov.
