Júzdesýde Estonıanyń burynǵy Prezıdenti Toomas Ilves ulttyq ekonomıkany sıfrlandyrý tájirıbesi jóninde aıtyp, sıfrlyq ekonomıkaǵa tıimdi kóshý úshin saıası erik-jigerdiń bolýy mańyzdy ekenine toqtaldy.
T.Ilves sıfrlyq qyzmetter kórsetýdi damytýdyń, jeli qoldanýshylarynyń sıfrlyq saýattylyǵyn arttyrýdyń jáne aqparattyq qaýipsizdikti qamtamasyz etýdiń mańyzdylyǵy jaıyndaǵy oıyn ortaǵa saldy.
Al Dúnıejúzilik saýda uıymy bas dırektorynyń orynbasary Alan Volf halyqaralyq elektrondy saýda júıesin damytýdyń qazirgi ahýaly men perspektıvalary jóninde áńgimeledi. Eýropa qaıta qurý jáne damý bankiniń birinshi vıse-prezıdenti Iýrgen Rıgterınk Qazaqstan ekonomıkasynyń ósimin jáne onyń qaıta qurylyp kele jatqanyn atap ótip, elimizdiń kólik-tranzıt áleýetin, agroónerkásip kesheni men «Astana» halyqaralyq qarjy ortalyǵynyń múmkindikterin paıdalanýdyń mańyzdy ekenin aıtty.
Birikken Ulttar Uıymy Saýda jáne damý jónindegi konferensıasynyń Bas hatshysy Mýhısa Kıtýıı Qazaqstandaǵy kedendik deklarasıalaýdyń jeńildetilýi esebinen qol jetkizilgen oń nátıjelerge toqtaldy. Beıbitshilik jónindegi Nobel syılyǵynyń laýreaty Radjendra Kýmar Pachaýrı klımat ózgeristeri nátıjesinde týyndaǵan problemalarǵa toqtalyp, «jasyl» tehnologıalardy damytýdyń jáne keńeıtýdiń mańyzdylyǵyn atap ótti. Radjendra Kýmar Pachaýrı Astanada ótken halyqaralyq «EKSPO-2017» mamandandyrylǵan kórmesiniń taqyryby men onyń naqty nátıjeleriniń ózektiligine nazar aýdardy. Beıbitshilik jónindegi Nobel syılyǵynyń laýreaty Rae Kvon Chýng ta «jasyl» ekonomıkaǵa kóshýdiń qajettigin aıtyp, balamaly energıa kózderin qoldanýdyń jaǵymdy tustaryn atap ótti.
«DP World» kompanıasy basqarmasynyń tóraǵasy Sultan Ahmed bın Sýlaıem logıstıkalyq jobalardy iske asyrý salasyndaǵy yntymaqtastyqty odan ári nyǵaıta túsýge múddelilik tanytty. Sultan Ahmed bın Sýlaıem Aqtaý qalasyndaǵy port pen «Qorǵas» shekara mańy yntymaqtastyǵy ortalyǵyn paıdalanýdyń tıimdiligi jóninde oı bólisti.
Óz kezeginde Ulybrıtanıa úkimetiniń tehnologıalar jónindegi keńesshisi Lıam Maksvell «aqyldy qalalardy» damytý jáne qalalardy basqarý úderisinde jasandy ıntellekt tehnologıalaryn qoldaný jónindegi oıyn ortaǵa saldy.
Álemniń jetekshi sarapshylarynyń baıandamalary tyńdalǵan soń Qazaqstan Prezıdenti jıynǵa qatysýshylarǵa Astana ekonomıkalyq forýmyna qatysqany jáne dóńgelek ústel otyrysynda aıtqan ıdeıalary úshin rızashylyq bildirdi.
– Eýropada Davos forýmy, bizde Astana ekonomıkalyq forýmy, al Tynyq muhıtynyń jaǵalaýynda Boao Azıa forýmy bar. Bul forýmdar bir ǵana maqsatty – qalyptasqan ahýaldan shyǵý jolyn izdeýdi kózdep otyr. Biz álemdik forýmdardyń bárimen yntymaqtastyq ornatyp, memleketter men halyqtardyń ıgiligi úshin jumys istegimiz keledi. Bul – damý, ilgerileý jáne túsinistik múmkindigi, – dedi Memleket basshysy.
Nursultan Nazarbaev jıynǵa qatysqan sarapshylardyń bári Astana ekonomıkalyq forýmynyń bedelin nyǵaıtýǵa jáne ony damytýǵa úles qosqanyn atap ótti. Sonymen qatar Qazaqstannyń damý tarıhyna toqtalyp, elimizde etnosaralyq jáne ultaralyq kelisimdi saqtaý jáne nyǵaıtý jolynda atqarylǵan jumys tájirıbesi jóninde aıtty.
– Biz Konstıtýsıada, zańnamalyq deńgeıde jáne is júzinde barlyq azamattar quqyqtarynyń teńdigin qamtamasyz ettik. Qazaqstanda barlyq dinı konfesıalardyń ókilderi turady. Olarǵa dinı nanym-senim bostandyǵy berilgen. Dástúrli dinderdiń álemdik kóshbasshylary ózderiniń sıezerin dál osy Astanada ótkizýge sheshim qabyldady. Bıyl kezekti Vİ sıez ótkeli otyr, – dedi Qazaqstan Prezıdenti.
Elbasy qonaqtarǵa Qazaqstannyń barlyq kórshiles eldermen dostyq jáne áriptestik qarym-qatynas ornatqanyn atap ótti. Búginde elimizdegi barlyq azamattardyń turmysyn jaqsartýǵa baǵyttalǵan sharalardyń arqasynda bizdiń qoǵamda turaqtylyq pen kelisimge qol jetkizilgenin basa aıtty.
– Táýelsizdik jyldarynda ekonomıkamyz 25 ese ósti. Jan basyna shaqqanda ishki jalpy ónim 12 myń dollarǵa jetti. Endi Ulttyq qorda jınaqtalǵan qarjynyń arqasynda ınfraqurylymdyq jáne ındýstrıaldyq damý, sondaı-aq bilim berý men densaýlyq saqtaý salalaryna arnalǵan baǵdarlamalardy júzege asyryp kelemiz. Elimizde ómir súrý uzaqtyǵy jeti jylǵa uzardy. Bizdiń jas urpaǵymyz bilimdi jáne órshil maqsatpen bolashaqqa kóz tigemiz, – dedi Qazaqstan Prezıdenti.
Sońynda Qazaqstan Prezıdenti Astana ekonomıkalyq forýmyna qatysýshylarǵa taǵy da rızashylyq bildirip, olardyń usynystary men ıdeıalary elimizdi odan ári damytý úshin mańyzdy ekenin atap ótti.
