Búgin Qyzylorda oblysynyń ákimi Nurlybek Nálibaev Seýl ulttyq ǵylym jáne tehnologiia ýniversitetiniń prezidenti Don Hvan Kimmen kezdesip, birlesip atqaratyn jumystardy talqylady, - dep habarlaidy Dalanews.kz
Basqosýǵa oblys ákiminiń orynbasary Ardaq Zebeshev, Qorqyt Ata atyndaǵy Qyzylorda ýniversitetiniń rektory Beibitkúl Kárimova, joǵary bilimdi internatsionaldandyrý basqarmasynyń basshysy Raýza Mendalieva, ýniversitettiń halyqaralyq qatynastar boiynsha vitse-prorektory Tehi Kim, ǵylymi zertteýler jáne josparlaý boiynsha vitse-prorektory Sýnýný Kang qatysty.
Oblys ákimi eńbek naryǵynyń suranysyna sai mamandar daiarlaýdyń mańyzyn atap ótti.
«Qazaqstan men Koreia Respýblikasy birneshe jyldan beri ashyq jáne senimdi qarym-qatynas ornatqan strategiialyq seriktes ekeni belgili. Eki el arasyndaǵy diplomatiialyq qarym-qatynastyń jolǵa qoiylǵanyna 33 jyl toldy. Kezinde Qyzylorda oblysyna qonystanǵan koreiler, olardyń urpaqtary ózderiniń adal eńbegimen aimaqtyń mádeni-rýhani, agrarlyq jáne áleýmettik-ekonomikalyq damýyna zor úles qosyp keledi.
Ekijaqty yntymaqtastyq aiasynda ónerkásip salasyna da kóńil bólingen. Koreilik “With You E&C Kyzylorda” kompaniiasy turmystyq qatty qaldyqtar óńdeitin zaýyt qurylysyn salýda. Quny 66,6 mln. AQSh dollary bolatyn joba eki kezeńde iske asyrylady, 160 jumys orny ashylady. Tiisti jer telimi tabystalyp, memlekettik qoldaý kórsetilýde.
Aral mańynda litiidiń mol qory bar. Bul jóninde Koreia geoǵylymdar jáne mineraldy resýrstar institýty (KIGAM) prezidenti Piong-Ký Li myrzamen kezdeskende baiandadyq. Aimaqtyń eńbek naryǵyna 28 baǵyt boiynsha maman daiarlaý qajet bolady. Osy atalǵan salalarda birlesip jumys jasaýǵa shaqyramyn. Issaparlaryńyz tabysty ári nátijeli bolatynyna senemin», – dedi N. Nálibaev.
Kezdesýde Don Hvan Kim ekijaqty yntymaqtastyqty damytý jáne odan ári nyǵaitý jolyndaǵy birlesken is-qimyl baǵytyna toqtaldy.
Aita keteiik, 2023 jyly Qazaqstandaǵy Koreia Respýblikasy Bas Konsýldyǵynyń resmi shaqyrtýymen aimaq basshysy bastaǵan delegatsiia Ońtústik Koreiaǵa baryp, ekijaqty kezdesýler men is-sharalar uiymdastyryldy. Sol saparda SeýlTeh ýniversitetimen bilim jáne ǵylym salasynda tiimdi bailanystar ornatyldy.
Nátijesinde 2023 jyly qarasha aiynda Qorqyt Ata ýniversitetinde Qazaqstandaǵy alǵashqy Jasandy intellekt institýty ashylyp, qazirgi tańda 100 stýdent bilim alýda.
Ótken jyldyń maýsym aiynda eki eldiń Memleket basshylarynyń qatysýymen ótken qazaq-korei forýmynda SeýlTeh jáne Qorqyt Ata atyndaǵy Qyzylorda ýniversiteti arasynda qos diplom baǵdarlamasy boiynsha kadr daiarlaý týraly kelisimge qol qoiyldy. Biyl qos diplomdy baǵdarlama boiynsha bilim alýshylardy qabyldaý bastalady.
