بۇگىن قىزىلوردا وبلىسىنىڭ اكىمى نۇرلىبەك نالىبايەۆ سەۋل ۇلتتىق عىلىم جانە تەحنولوگيا ۋنيۆەرسيتەتىنىڭ پرەزيدەنتى دون حۆان كيممەن كەزدەسىپ، بىرلەسىپ اتقاراتىن جۇمىستاردى تالقىلادى، - دەپ حابارلايدى Dalanews.kz
باسقوسۋعا وبلىس اكىمىنىڭ ورىنباسارى ارداق زەبەشيەۆ، قورقىت اتا اتىنداعى قىزىلوردا ۋنيۆەرسيتەتىنىڭ رەكتورى بەيبىتكۇل كارىموۆا، جوعارى ءبىلىمدى ينتەرناسيونالداندىرۋ باسقارماسىنىڭ باسشىسى راۋزا مەندالييەۆا، ۋنيۆەرسيتەتتىڭ حالىقارالىق قاتىناستار بويىنشا ۆيسە-پرورەكتورى تەحي كيم، عىلىمي زەرتتەۋلەر جانە جوسپارلاۋ بويىنشا ۆيسە-پرورەكتورى سۋنۋنۋ كانگ قاتىستى.
وبلىس اكىمى ەڭبەك نارىعىنىڭ سۇرانىسىنا ساي ماماندار دايارلاۋدىڭ ماڭىزىن اتاپ ءوتتى.
«قازاقستان مەن كورەيا رەسپۋبليكاسى بىرنەشە جىلدان بەرى اشىق جانە سەنىمدى قارىم-قاتىناس ورناتقان ستراتەگيالىق سەرىكتەس ەكەنى بەلگىلى. ەكى ەل اراسىنداعى ديپلوماتيالىق قارىم-قاتىناستىڭ جولعا قويىلعانىنا 33 جىل تولدى. كەزىندە قىزىلوردا وبلىسىنا قونىستانعان كورەيلەر، ولاردىڭ ۇرپاقتارى وزدەرىنىڭ ادال ەڭبەگىمەن ايماقتىڭ مادەني-رۋحاني، اگرارلىق جانە الەۋمەتتىك-ەكونوميكالىق دامۋىنا زور ۇلەس قوسىپ كەلەدى.
ەكىجاقتى ىنتىماقتاستىق اياسىندا ونەركاسىپ سالاسىنا دا كوڭىل بولىنگەن. كورەيلىك “With You E&C Kyzylorda” كومپانياسى تۇرمىستىق قاتتى قالدىقتار وڭدەيتىن زاۋىت قۇرىلىسىن سالۋدا. قۇنى 66،6 ملن. اقش دوللارى بولاتىن جوبا ەكى كەزەڭدە ىسكە اسىرىلادى، 160 جۇمىس ورنى اشىلادى. ءتيىستى جەر تەلىمى تابىستالىپ، مەملەكەتتىك قولداۋ كورسەتىلۋدە.
ارال ماڭىندا ءليتييدىڭ مول قورى بار. بۇل جونىندە كورەيا گەوعىلىمدار جانە مينەرالدى رەسۋرستار ينستيتۋتى (KIGAM) پرەزيدەنتى پونگ-كۋ لي مىرزامەن كەزدەسكەندە باياندادىق. ايماقتىڭ ەڭبەك نارىعىنا 28 باعىت بويىنشا مامان دايارلاۋ قاجەت بولادى. وسى اتالعان سالالاردا بىرلەسىپ جۇمىس جاساۋعا شاقىرامىن. ءىسساپارلارىڭىز تابىستى ءارى ناتيجەلى بولاتىنىنا سەنەمىن»، – دەدى ن. نالىبايەۆ.
كەزدەسۋدە دون حۆان كيم ەكىجاقتى ىنتىماقتاستىقتى دامىتۋ جانە ودان ءارى نىعايتۋ جولىنداعى بىرلەسكەن ءىس-قيمىل باعىتىنا توقتالدى.
ايتا كەتەيىك، 2023 جىلى قازاقستانداعى كورەيا رەسپۋبليكاسى باس كونسۋلدىعىنىڭ رەسمي شاقىرتۋىمەن ايماق باسشىسى باستاعان دەلەگاسيا وڭتۇستىك كورەياعا بارىپ، ەكىجاقتى كەزدەسۋلەر مەن ءىس-شارالار ۇيىمداستىرىلدى. سول ساپاردا سەۋلتەح ۋنيۆەرسيتەتىمەن ءبىلىم جانە عىلىم سالاسىندا ءتيىمدى بايلانىستار ورناتىلدى.
ناتيجەسىندە 2023 جىلى قاراشا ايىندا قورقىت اتا ۋنيۆەرسيتەتىندە قازاقستانداعى العاشقى جاساندى ينتەللەكت ينستيتۋتى اشىلىپ، قازىرگى تاڭدا 100 ستۋدەنت ءبىلىم الۋدا.
وتكەن جىلدىڭ ماۋسىم ايىندا ەكى ەلدىڭ مەملەكەت باسشىلارىنىڭ قاتىسۋىمەن وتكەن قازاق-كورەي فورۋمىندا سەۋلتەح جانە قورقىت اتا اتىنداعى قىزىلوردا ۋنيۆەرسيتەتى اراسىندا قوس ديپلوم باعدارلاماسى بويىنشا كادر دايارلاۋ تۋرالى كەلىسىمگە قول قويىلدى. بيىل قوس ديپلومدى باعدارلاما بويىنشا ءبىلىم الۋشىلاردى قابىلداۋ باستالادى.
