Kúni keshe ǵana QR Parlamenti Senatynyń Spikeri Máýlen Áshimbaev senatorlardyń ne istep, ne qoiyp jatqany jaiynda Feisbýktaǵy paraqshasynda túsinikteme bergen edi.
Áshimbaevtyń izin ala QR Parlamenti Májilisiniń Tóraǵasy Nurlan Nyǵmatýlin Májilis depýtattarynyń jazǵy kanikýl kezinde shetelde demalyp jatyr degen aqparatty joqqa shyǵaryp, oiyn ortaǵa saldy.
Tómengi palatanyń jetekshisi Nurlan Nyǵmatýlin qazirgi tańda depýtattar ózderiniń aimaqtarda jumys istep jatqanyn alǵa tartty. Sondai-aq, ol biyl depýttardyń jazǵy demalysyn qalai ótkizip jatqany pandameia kezinde jurttyń qyzyǵýshylyǵyn oiatqanyn da atap ótti.
– «Parlamenttik kanikýl» degenniń aty bolmasa, jazda depýtattar óz aimaqtaryna baryp jumystaryn jalǵastyrady. Biyl indetke bailanysty májilismenderdiń halyqpen kezdesýine shekteý qoiylǵany belgili. Biraq bizdiń alys aýyl-aýdandarǵa baryp, ondaiǵy jaǵdaimen tanysý jumystary jalǵastyrýdamyz. Tek halyqty jinap, júzdesý ótkizbeimiz.
Búginde depýtattar jergilikti jerlerdegi monitoringtik toptarmen birge dárihanalar men emhanalarǵa baryp qoǵamdyq baqylaý júrgizýde. Budan basqa aimaqtarda dári-dármektiń kólemi men baǵasyn da nazarda ustap, indetpen kúresip jatqan dárigerlerge jaǵdai jasaý máselesine de barynsha kóńil bólip otyrǵanyn aitqym keledi.
Sonymen qatar depýtattar gýmanitarlyq kómekterdi jetkizip, taratý jumystaryna, volonterlik ortalyqtardyń jumysyna belsene aralasýda. Mundai qiyn kezeńde depýtattar da qarap jatqan joq. Elmen birge qiyndyqty eńserýge kúsh salyp jatyr, – dedi Májilis Tóraǵasy Nurlan Nyǵmatýlin.
Óz kezeginde tómengi palatanyń Tóraǵasy depýtattardyń ne istep, ne qoiyp jatqanyn Facebook jeke paraqshasydaǵy jazbalarynan baqylaýǵa bolatynyn aitty. Sonymen qatar ol depýtattardyń túrli qaiyrymdylyq sharalaryna belsene qatysyp jatqanyn da alǵa tartty.
– Qazir áleýmettik jelide «depýtattar shetelde demalyp jatyr» degen qaýeset áńgime qyzý talqylanyp jatqanyn kórdim. Tipti, keibireýler bul úshin charterlik reis uiymdastyryldy degen jalǵan aqparat taratýda. Osy rette bul aqparattardyń shyndyqqa múlde janaspaitynyn aitqym keledi. Mundai qaýeset áńgimelerge senbeńizder!
Barlyq depýtattar elde, osyndai qiyn kezeńde el azamattarymen birge indetpen kúresýde. Tipi, keibir depýttardyń ózi virýs juqtyryp, aýyryp qaldy. Endi biri eń jaqyn adamdaryn aiyrylyp, qiyndyqpen betpe bet keldi. Biraq áriptesterimiz osyndai qiyndyqqa qaramastan aimaqtardaǵy jumystaryn jalǵastyrýda, – dedi Nurlan Nyǵmatýlin áleýmettik jelide taralǵan áńgimelerdi joqqa shyǵardy.
