بەلگىلى قوعام بەلسەندىسى باقىتجان تورەعوجينا دەپۋتاتتاردىڭ جازعى كانيكۋل كەزىندە نەمەن اينالىسىپ جۇرگەنىن انىقتاۋ ماقساتىندا ۇيىمداستىرعان مونيتورينگى الەۋمەتتىك جەلىدە قىزۋ تالقىلانۋدا.

كۇنى كەشە عانا ق ر پارلامەنتى سەناتىنىڭ سپيكەرى ماۋلەن اشىمبايەۆ سەناتورلاردىڭ نە ىستەپ، نە قويىپ جاتقانى جايىندا فەيسبۋكتاعى پاراقشاسىندا تۇسىنىكتەمە بەرگەن ەدى.

اشىمبايەۆتىڭ ءىزىن الا ق ر پارلامەنتى ءماجىلىسىنىڭ ءتوراعاسى نۇرلان نىعماتۋلين ءماجىلىس دەپۋتاتتارىنىڭ جازعى كانيكۋل كەزىندە شەتەلدە دەمالىپ جاتىر دەگەن اقپاراتتى جوققا شىعارىپ، ويىن ورتاعا سالدى.

تومەنگى پالاتانىڭ جەتەكشىسى نۇرلان نىعماتۋلين قازىرگى تاڭدا دەپۋتاتتار وزدەرىنىڭ ايماقتاردا جۇمىس ىستەپ جاتقانىن العا تارتتى. سونداي-اق، ول بيىل دەپۋتتاردىڭ جازعى دەمالىسىن قالاي وتكىزىپ جاتقانى پاندامەيا كەزىندە جۇرتتىڭ قىزىعۋشىلىعىن وياتقانىن دا اتاپ ءوتتى.

– «پارلامەنتتىك كانيكۋل» دەگەننىڭ اتى بولماسا، جازدا دەپۋتاتتار ءوز ايماقتارىنا بارىپ جۇمىستارىن جالعاستىرادى. بيىل ىندەتكە بايلانىستى ماجىلىسمەندەردىڭ حالىقپەن كەزدەسۋىنە شەكتەۋ قويىلعانى بەلگىلى. ءبىراق ءبىزدىڭ الىس اۋىل-اۋداندارعا بارىپ، وندايعى جاعدايمەن تانىسۋ جۇمىستارى جالعاستىرۋدامىز. تەك حالىقتى جيناپ، جۇزدەسۋ وتكىزبەيمىز.

بۇگىندە دەپۋتاتتار جەرگىلىكتى جەرلەردەگى مونيتورينگتىك توپتارمەن بىرگە ءدارىحانالار مەن ەمحانالارعا بارىپ قوعامدىق باقىلاۋ جۇرگىزۋدە. بۇدان باسقا ايماقتاردا دارى-دارمەكتىڭ كولەمى مەن باعاسىن دا نازاردا ۇستاپ، ىندەتپەن كۇرەسىپ جاتقان دارىگەرلەرگە جاعداي جاساۋ ماسەلەسىنە دە بارىنشا كوڭىل ءبولىپ وتىرعانىن ايتقىم كەلەدى.

سونىمەن قاتار دەپۋتاتتار گۋمانيتارلىق كومەكتەردى جەتكىزىپ، تاراتۋ جۇمىستارىنا، ۆولونتەرلىك ورتالىقتاردىڭ جۇمىسىنا بەلسەنە ارالاسۋدا. مۇنداي قيىن كەزەڭدە دەپۋتاتتار دا قاراپ جاتقان جوق. ەلمەن بىرگە قيىندىقتى ەڭسەرۋگە كۇش سالىپ جاتىر، – دەدى ءماجىلىس ءتوراعاسى نۇرلان نىعماتۋلين.

ءوز كەزەگىندە تومەنگى پالاتانىڭ ءتوراعاسى دەپۋتاتتاردىڭ نە ىستەپ، نە قويىپ جاتقانىن Facebook جەكە پاراقشاسىداعى جازبالارىنان باقىلاۋعا بولاتىنىن ايتتى. سونىمەن قاتار ول دەپۋتاتتاردىڭ ءتۇرلى قايىرىمدىلىق شارالارىنا بەلسەنە قاتىسىپ جاتقانىن دا العا تارتتى.

– ءقازىر الەۋمەتتىك جەلىدە «دەپۋتاتتار شەتەلدە دەمالىپ جاتىر» دەگەن قاۋەسەت اڭگىمە قىزۋ تالقىلانىپ جاتقانىن كوردىم. ءتىپتى، كەيبىرەۋلەر بۇل ءۇشىن چارتەرلىك رەيس ۇيىمداستىرىلدى دەگەن جالعان اقپارات تاراتۋدا. وسى رەتتە بۇل اقپاراتتاردىڭ شىندىققا مۇلدە جاناسپايتىنىن ايتقىم كەلەدى. مۇنداي قاۋەسەت اڭگىمەلەرگە سەنبەڭىزدەر!

بارلىق دەپۋتاتتار ەلدە، وسىنداي قيىن كەزەڭدە ەل ازاماتتارىمەن بىرگە ىندەتپەن كۇرەسۋدە. ءتىپى، كەيبىر دەپۋتتاردىڭ ءوزى ۆيرۋس جۇقتىرىپ، اۋىرىپ قالدى. ەندى ءبىرى ەڭ جاقىن ادامدارىن ايىرىلىپ، قيىندىقپەن بەتپە بەت كەلدى. ءبىراق ارىپتەستەرىمىز وسىنداي قيىندىققا قاراماستان ايماقتارداعى جۇمىستارىن جالعاستىرۋدا، – دەدى نۇرلان نىعماتۋلين الەۋمەتتىك جەلىدە تارالعان اڭگىمەلەردى جوققا شىعاردى.