Astanada Halyq qaharmany, Memlekettik syilyqtyń laýreaty, esimi ańyzǵa ainalǵan Nurǵisa Tilendievtiń 100 jyldyǵyna arnalǵan «Qustar áni» respýblikalyq festivali ótip jatyr, dep habarlaidy Dalanews.kz elorda ákimdiginiń resmi saityna silteme jasap.
Astana qalasy ákimdiginiń E.Rahmadiev atyndaǵy Memlekettik akademiialyq filarmoniiasy uiymdastyrǵan aýqymdy is-sharanyń maqsaty kórnekti kompozitordyń shyǵarmashylyq murasyn keńinen nasihattaý, ulttyq mýzyka óneriniń damýyna yqpal etý, jas mýzykanttarǵa qoldaý kórsetý jáne óńirlik óner ujymdarynyń tájiribe almasýyna múmkindik jasaý bolatyn.
«Festivalde áýeli óner iesiniń ómiri men shyǵarmashylyǵyn eske alýǵa arnalǵan dóńgelek ústel ótti, sosyn Nurǵisa Tilendiev atyndaǵy akademiialyq folklorly-etnografiialyq «Otyrar sazy» orkestriniń kontserti boldy. Endi óńirlik filarmoniia ujymdarynyń kontserti uiymdastyrylady, onda 10 shaqty oblystan kelgen ártister óner kórsetedi. 4 sáýirde E.Rahmadiev atyndaǵy Memlekettik akademiialyq filarmoniianyń qazaq orkestri festivaldi qorytyndylaidy. Festival elordamyzda alǵash ret uiymdastyrylyp otyr», - dedi QR eńbek sińirgen qairatkeri Aitqali Jaiymov.
Óner iesininiń ómiri men shyǵarmashylyǵyn eske alýǵa arnalǵan dóńgelek ústel filarmoniianyń kameralyq zalynda ótti.
Festival aiasyndaǵy búgingi is-sharalar legi Nurǵisa Tilendiev atyndaǵy akademiialyq folklorly-etnografiialyq «Otyrar sazy» orkestriniń kontsertimen jalǵasty.
Saf ónerdiń sańlaǵy sanaly ǵumyrynda 500-den astam án, kúi, romans, ývertiýra, poema, kontata, opera, balet, 40-tan astam pesa men 20-dan astam filmge mýzyka jazsa, búgingi kontsertte solardyń ishindegi mańdaialdy týyndylary oryndaldy.
Mýzyka ónerine qubylys bolyp kelgen syrly sýretker ózindik qoltańbasymen qasietti qazaq áýenin jańa beleske kóterdi. Onyń ásem ánderi, kúmbirlegen kúileri, iri shyǵarmalary altyn qorǵa endi. Festivaldiń maqsaty sol bir ómirsheń týyndylardy óz biiginde áspetteý, ulyqtaý bolsa, kontsertte «Otyrar sazy» orkestriniń kórkemdik jetekshisi jáne bas dirijery, Qazaqstannyń eńbek sińirgen qairatkeri Dinzýhra Tilendieva bastaǵan óner maitalmandary bul biik údeden múdirmei ótip, kórermenniń ystyq yqylasyna bólendi.
