Sherzat Bolattyń qazasynan keiingi kúdik pen kúmándi tusy kóp taǵy bir jait - Nurǵanat Ǵaiypbaevtyń ólimi. Ázirge quzyrly organdar bul jaitqa qatysty únsiz, buǵan deiin tergeý júrgizilip jatqanyn málimdedi. Marqumnyń ápkesi Perizat Nurymova osy jáne ózge de oqiǵalarǵa bailanysty óz shyndyǵyn aitty, dep habarlaidy Dalanews.kz.
Ol qaraly kún jaiynda áńgimelep, Nurǵanat jazdy delingen hattyń astarynda túsiniksiz jait kóp ekenin jetkizdi.
"Mamamdar Nurǵanatty joǵary jaqta uiyqtap jatyr dep oilaǵan, men tómenge túsip ketti dep oiladym. Sol arada eshkimge bildirtpei kiinip ketip qalǵan. Aldyn ala bilgende áreket jasar ma edik. Ózimiz tappai qaldyq. 34 jasyma deiin ápke dep kórmegen, dosyndai kóretin, aramyz 4-aq jas, odan 4 jasqa úlkenmin. Hatta "ápke, sen meni osy ómirde barlyq nársege úirettiń, demeýshi bolyp, kómektesip júrdiń" dep jazylǵan. "Anam, amanat, balalaryń úshin ómir súr" degen. Qoshtasý bolyp tur. Birinshiden, eshqashan olai uzaq jazbaityn. Dybystyq habarlama nemese aýdio, videoqońyraý arqyly shyǵatyn. Qysqa jazýy múmkin. Anadai jerde uzaq qylyp jazý úshin qansha ýaqyt daiyndalý kerek?!
Meniń ózime keletin bir kúdik: biz bes aǵaiyndymyz ǵoi, tórteýimizge ǵana habarlama keledi, kishkentai sińilime habarlama kelmeidi. Nege? Bilmeitin adam solai jazdy. Óitkeni bes aǵaiyndy ekenimizdi endi bilip jatyr. Besinshisi kim ekenin eshkim bilmeidi, atyn atamaimyz, túrin tústep kórsetpeimiz. Ol qyz - stýdent, sol úshin qorqamyz. Bizsiz de dostarymen júredi. Basqasy bar. Meniń jeke oiym, men úshin kúdikti, ózi jazýy múmkin emes. Ony basqa bireý jazdy, bes aǵaiyndy ekenimizdi bilmeitin adam jazdy, besinshisiniń kim ekenin bilmeitin adam jazdy. Óz-ózine qol sala almaidy. Ondai habarlama jaza almaidy", - dedi Perizat Nurymova Qazaq Airan-ǵa bergen suhbatynda.
Advokat Meiirman Shekeev Nurǵanat Ǵaiypbaevtyń isi qai satyda ekenin aitty.
"Osy otbasyǵa qatysty isterdiń bári meniń óndirisimde: Qarjaýbaiǵa, Nurǵanatqa, úige qatysty ister. Jaqynda ǵana tergeýshi habarlasty. Aldynda ishki ister ministriniń orynbasary "bul ister áli jabylǵan joq" dedi. Dál sodan bir kúnnen keiin be, tergeýshi habarlasyp, "Nuraǵanattyń isi qysqartyldy" dedi. Men ol kezde Túrkiiada júrgenmin. Qazirgi tańda Nurǵanattyń isi boiynsha Jumabike hanym jábirlenýshi bolyp tanylady. Ol kisiniń ókili menmin. Sol kisi kelgenin kútip júrmin. Kelgennen keiin baryp ispen tanysyp, protsedýaldyq kemshilikter bolsa, shaǵym túsiremiz. Biraq bizge kelgen sońǵy aqparat boiynsha ol is qysqartylǵan", - dedi advokat suhbatynda.
Sonymen qatar, advokat úi órtengen oqiǵa boiynsha is qalai órbip jatqanyn baiandady.
"Úidiń máselesi boiynsha is jalǵasyp jatyr. Sońǵy maǵan bergen aqparat boiynsha "Resei Federatsiiasynan sol kúngi spýtnik túsirilimderin suratqanbyz" degen. Meniń paiymdaýymsha, áli kelmegen. Sondyqtan is áli jabylǵan joq. Meniń tájiribemde birinshi ret (Reseiden suratý - esk.). Is rezonansty bolǵannan keiin sondai jasaǵan bolar", - dedi Meiirman Shekkev.
Meiirman Shekeev "sottan shyqqan kezde "qaraqalpaq" dep aiǵailaǵandar jaýapqa tartyla ma?" degen saýalǵa jaýap berdi.
"Ol boiynsha ákimshilik jaza qoldanyldy. Bir ata-ana "qaraqalpaq" dep aiǵailap, shý kótergeni úshin hattama toltyryldy", - dedi advokat.
Sherzat Bolattyń ólimi týraly ne belgili?
Eske salaiyq, byltyr Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boiynsha Almaty oblysynyń Politsiia departamenti qylmystyq is qozǵady. Sondai-aq, olardyń úii órtenip ketti.
Kóp uzamai, iaǵni 9 jeltoqsanda marqum Sherzat Bolattyń aǵasy Nurǵanat Ǵaiypbaev ajal qushty. Politsiia departamenti aldyn ala derekter boiynsha ol sýitsid jasaǵanyn málimdedi. Oǵan dálel retinde politseiler Nurǵanattyń týysyna messendjer arqyly jazǵan hatyn jariia etti.
Al marqum Sherzattyń ákesi baýyry Nurǵanat Ǵaiypbaevty jer qoinyna tapsyrǵannan keiin buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keiin Qarjaýbai Nurymov 15 táýlikke ákimshilik qamaýǵa alyndy.
Jýyrda osy is boiynsha sot sheshimi shyqty. Tergeý málimetinshe, Sherzatqa pyshaq jaraqatyn salǵan basty aiyptalýshy Abzal Shynasyl 23 jylǵa bas bostandyǵynan aiyryldy. Ravil Sakiev 20 jylǵa sottaldy.
Qalǵan aiyptalýshylar 7 jyldan 15 jylǵa deiin bas bostandyǵynan aiyryldy. Kámeletke tolmaǵan Y.D. 1,5 jylǵa bas bostandyǵynan aiyryldy.
