Nurai Serikbaiǵa qatysty «72 ret pyshaq tyǵar edim» dep pikir jazǵan turǵyn sot aldynda jaýap beredi, dep habarlaidy dalanews.kz.
Advokat Aianhan Omarovtyń sózinshe, Nuraiǵa qatysty «72 ret pyshaq tyǵar edim» dep jariia túrde pikir qaldyrǵan @dkraken9 akkaýntynyń iesine qatysty politsiia qyzmetkerlerimen Qazaqstan Respýblikasy Ákimshilik quqyq buzýshylyq týraly kodeksiniń 456-2-babynyń 3-bóligi boiynsha ákimshilik quqyq buzýshylyq týraly hattama toltyryldy.
Iaǵni, quqyqqa qaishy kontentti áleýmettik jelide jariialaǵany úshin ákimshilik jaýaptylyq máselesi qaralady. Aldaǵy ýaqytta is sotta qaralady. Zańǵa sáikes, quqyq buzýshyǵa 20 AEK (86 500 teńge) mólsherinde ákimshilik aiyppul salynýy múmkin.
Bul is áleýmettik jelidegi jariialanǵan pikirlerdiń de quqyqtyq jaýapkershilikke ákelýi múmkin ekenin kórsetedi. Istiń barysy týraly qosymsha aqparatpen bólisetin bolamyn. Sebebi, atalǵan tulǵanyń osy maǵynalas basqa da kommentariiler jazǵany belgili boldy, - deidi advokat.
