Shymkentte Nurai Serikbaidyń qazasyna bailanysty qozǵalǵan qylmystyq is boiynsha basty sot talqylaýy bastaldy. 28 shildede ótken sot otyrysynda aiyptalýshy Sherhan Aimahannan jaýap alyndy, dep habarlaidy dalanews.kz.
Sottalýshynyń aitýynsha, ol Nurai Serikbaimen 2025 jyldyń shilde aiynan bastap kezdesken. Ol qyzǵa qarjylai kómektesip, túrli syilyqtar bergenin málimdedi.
"Nuraiǵa qolma-qol aqsha berip júrdim. Shymkentte bolǵan kezinde 350 myń teńge berdim. Budan bólek, syilyqtar alyp beretinmin. Ol menen ai saiyn Almatyǵa baryp turýymdy talap etti", – dedi Sherhan Aimahan sotta.
Aiyptalýshynyń sózinshe, 2025 jyldyń 4 qazanynda ekeýi shańyraq kóterýge kelisken. Osydan keiin olar Almatydan Shymkentke birge jolǵa shyqqan.
Sherhan Aimahan Nuraidy úiine jetkizgen soń, odan qolhat jazdyryp alǵanyn aitty. Ol mundai árekettiń salt-dástúrge bailanysty jasalǵanyn alǵa tartty.
Sottalýshy Nuraidyń otbasy olardyń qarym-qatynasynan habardar bolǵanyn da málimdedi.
"Alǵashqy kezdesýge ol anasy tigip bergen kóilekti kiip shyqty. Anasynyń ruqsatymen kezdesti. Anasy men eki aǵasy – Dimash pen Sultan bizdiń kezdesip júrgenimizdi bildi. Olar meniń Nuraidyń jumysyna baryp júrgenimdi de kórdi", – dedi ol.
Qaiǵyly oqiǵa bolǵan kún
Aiyptalýshynyń aitýynsha, 2026 jyldyń 11 qańtarynda ol Nuraimen qarym-qatynasyn toqtatý úshin kezdesýge shaqyrǵan. Sottalýshy qyzǵa saqinany qaitaryp, qoshtasýdy josparlaǵanyn jetkizdi.
Onyń nusqasy boiynsha, aiyrylysatynyn aitqan kezde Nurai ashýlanyp, saqinany kóshege laqtyryp jibergen. Budan keiin aralarynda janjal týyndaǵan.
"Qoshtasatynymdy aitqannan keiin Nurai meni keýdemnen uryp, balaǵattai bastady. Qaltamda pyshaq baryn sezdim. Eki pyshaqtyń kishkentaiyn berip, "urǵansha, pyshaqta" dedim. Nurai pyshaqty alyp, sol qolymen oń jaq tusyma suqty. Men artqa shegindim. Odan keiin ne bolǵany esimde joq", – dedi Sherhan Aimahan.
