Shymkent qalasynyń mamandandyrylǵan aýdanaralyq sotynda 21 jastaǵy Nurai Serikbaidyń ólimine qatysty qylmystyq iske bailanysty sot protsesi jalǵasyp jatyr, dep habarlaidy dalanews.kz informburo.kz-ke silteme jasap.
Kezekti sot otyrysynda burynǵy politsiia qyzmetkeri Ábilǵazy Artyqbai kýálik berdi. Onyń aitýynsha, 5 qazan kúni keshke Nuraidyń aǵasynan «qyzdy kúshtep alyp ketti» degen habarlama túskennen keiin ol oqiǵa ornyna barǵan.
Politseidiń sózinshe, kúdikti Sherhan Aimahannyń úiine kelgen kezde Nuraidyń aǵalary qaryndastarynyń urlanǵanyn aitqan. Keiin úige kirip, qyzdan "osynda óz erkińmen keldiń be?" dep suraǵanda, Nurai muny rastaǵan.
Keiin politsei Nurai Serikbai men Sherhan Aimahandy politsiia bólimine jetkizgen. Onda qyz ózine qatysty eshqandai shaǵymy joq ekenin aitqan. Bul túsinikteme beinejazbaǵa da túsirilgen.
Sot barysynda jábirlenýshi taraptyń advokaty politsiia qyzmetkerinen ne sebepti túsiniktemeni beinekameraǵa jazyp alǵanyn surady. Buǵan jaýap retinde kýá mundai árekettiń qalypty tájiribe ekenin, politsiiaǵa kún saiyn kóptegen azamat júginetinin aitty.
Sondai-aq ol beinejazbadaǵy Nuraidyń sózi aldyn ala daiyndalǵan nemese ózine bireý aityp turǵan degen pikirmen kelispeitinin jetkizdi.
Al jábirlenýshi taraptyń advokaty istegi materialdarǵa súiene otyryp, qyzdyń sózi jattap alǵandai áser qaldyratynyn alǵa tartty. Onyń aitýynsha, beinejazbada politseidiń Nuraiǵa keibir sózderdi aityp turǵany estiledi.
Alaida burynǵy politsiia qyzmetkeri bul aiyptaýdy joqqa shyǵaryp:
"Men oǵan eshteńe aityp turǵan joqpyn, ondai bolǵan emes", – dep jaýap berdi.
Sondai-aq ol sol kúni qabyldanǵan sheshimdi zańdy ári ádil dep sanaitynyn aitty. Budan bólek, sheshim prokýratýranyń nusqaýymen qabyldandy degen málimdemeni de teriske shyǵardy.
Eske salaiyq, 2026 jyldyń 11 qańtarynda Shymkentte 21 jastaǵy stýdent Nurai Serikbai pyshaq jaraqatynan qaza tapty. Tergeý nusqasyna sáikes, 28 jastaǵy Sherhan Aimahan qyzdy dúken mańynda kútip turyp, birneshe ret pyshaqtaǵan. Oqiǵadan keiin kúdikti qashyp ketkenimen, arada kóp ýaqyt ótpei qaladan shamamen 10 shaqyrym jerde ustalyp, ýaqytsha ustaý izoliatoryna qamalǵan.
