Shymkentte 21 jastaǵy Nurai Serikbaidyń ólimine qatysty rezonansty qylmystyq is boiynsha sot otyrysy jalǵasty. Memlekettik aiyptaýshy aiyptaý aktisin oqyp, tergeý nusqasyna sáikes, boijetkenge 35 ret pyshaq suǵylǵanyn málimdedi. Bul týraly OTYRAR TV telearnasynyń Instagram paraqshasynda habarlandy, dep jazady dalanews.kz.
Aita keteiik, bul – aiyptaý tarapynyń sotta jariialaǵan nusqasy. Aiyptalýshynyń kinási men oqiǵanyń barlyq mán-jaiyna sot úkim shyqqan kezde túpkilikti quqyqtyq baǵa beredi.
Prokýror aiyptaý aktisin oqydy
Qylmystyq is Shymkent qalasynyń qylmystyq ister jónindegi mamandandyrylǵan aýdanaralyq sotynda qaralyp jatyr. Alǵashqy aldyn ala tyńdaý 21 shildege belgilengen edi. Alaida sot otyrysy aiyptalýshynyń densaýlyq jaǵdaiyna bailanysty úzilispen ótip, kelesi protsess 23 shildege taǵaiyndalǵan.
Sotta prokýror qylmystyń qalai jasalǵany jónindegi tergeý qorytyndysyn tanystyrdy. OTYRAR TV taratqan málimet boiynsha, aiyptaý aktisinde Nurai Serikbaiǵa 35 ret pyshaq jaraqaty salynǵany aitylǵan.
Nurai Serikbaidyń ólimine qatysty ne belgili?
Qaiǵyly jaǵdai 2026 jylǵy 11 qańtarda Shymkentte bolǵan. Tergeý málimetinshe, Nurai Serikbai úiinen dúkenge shyqqan kezde ony burynnan tanys er adam kútip turǵan. Boijetken qashyp qutylýǵa áreket jasaǵanymen, kúdikti ony qýyp jetip, birneshe ret pyshaq jaraqatyn salǵan. Nurai oqiǵa ornynda kóz jumǵan.
Kúdikti oqiǵa ornynan qashyp ketken. Eki kúnnen keiin politsiia ony Shymkentten shamamen 10 shaqyrym qashyqtyqtaǵy ashyq aýmaqtan ustap, tergeý izoliatoryna qamady.
Marqumnyń jaqyndary kúdiktiniń Nuraidy buǵan deiin ańdyp, qorqytyp júrgenin málimdegen. Týystarynyń sózinshe, er adam boijetkendi erkinen tys alyp ketýge áreket jasap, keiin de ony mazalaýyn toqtatpaǵan. Otbasy politsiia men prokýratýraǵa birneshe ret júgingenin aitqan.
