Шымкентте 21 жастағы Нұрай Серікбайдың өліміне қатысты резонансты қылмыстық іс бойынша сот отырысы жалғасты. Мемлекеттік айыптаушы айыптау актісін оқып, тергеу нұсқасына сәйкес, бойжеткенге 35 рет пышақ сұғылғанын мәлімдеді. Бұл туралы OTYRAR TV телеарнасының Instagram парақшасында хабарланды, деп жазады dalanews.kz.
Айта кетейік, бұл – айыптау тарапының сотта жариялаған нұсқасы. Айыпталушының кінәсі мен оқиғаның барлық мән-жайына сот үкім шыққан кезде түпкілікті құқықтық баға береді.
Прокурор айыптау актісін оқыды
Қылмыстық іс Шымкент қаласының қылмыстық істер жөніндегі мамандандырылған ауданаралық сотында қаралып жатыр. Алғашқы алдын ала тыңдау 21 шілдеге белгіленген еді. Алайда сот отырысы айыпталушының денсаулық жағдайына байланысты үзіліспен өтіп, келесі процесс 23 шілдеге тағайындалған.
Сотта прокурор қылмыстың қалай жасалғаны жөніндегі тергеу қорытындысын таныстырды. OTYRAR TV таратқан мәлімет бойынша, айыптау актісінде Нұрай Серікбайға 35 рет пышақ жарақаты салынғаны айтылған.
Нұрай Серікбайдың өліміне қатысты не белгілі?
Қайғылы жағдай 2026 жылғы 11 қаңтарда Шымкентте болған. Тергеу мәліметінше, Нұрай Серікбай үйінен дүкенге шыққан кезде оны бұрыннан таныс ер адам күтіп тұрған. Бойжеткен қашып құтылуға әрекет жасағанымен, күдікті оны қуып жетіп, бірнеше рет пышақ жарақатын салған. Нұрай оқиға орнында көз жұмған.
Күдікті оқиға орнынан қашып кеткен. Екі күннен кейін полиция оны Шымкенттен шамамен 10 шақырым қашықтықтағы ашық аумақтан ұстап, тергеу изоляторына қамады.
Марқұмның жақындары күдіктінің Нұрайды бұған дейін аңдып, қорқытып жүргенін мәлімдеген. Туыстарының сөзінше, ер адам бойжеткенді еркінен тыс алып кетуге әрекет жасап, кейін де оны мазалауын тоқтатпаған. Отбасы полиция мен прокуратураға бірнеше рет жүгінгенін айтқан.
