Nur Otan. Aimaqtarda «Jastar-Otanǵa!» baǵdarlamasy iske asyratyn 216 óńirlik Jol kartasy bekitildi
Máselen, aldaǵy bes jyl ishinde 3,5 myńǵa jýyq indikatorǵa qol jetkizý, 35 jasqa deiingi 4,5 millionnan astam jas qazaqstandyqty qamtityn 6,5 myń is-sharany iske asyrý josparlanýda.
«Jastar-Otanǵa!» baǵdarlamasy, jastardyń ómir súrý deńgeii men áleýmettik jaǵdaiyn arttyrýǵa baǵyttalǵan 5 baǵyttaǵy jumysty qamtidy: azamattyq belsendilik, sapaly bilim, jumyspen qamtý, qoljetimdi baspana jáne jas otbasylardy qoldaý, tulǵa retinde damý men bos ýaqytty tiimdi ótkizý.
Atap aitqanda, qalalyq jáne aýyldyq mektepter arasyndaǵy bilim berý sapasyndaǵy alshaqtyq qysqartylady, jastardyń ǵylymi-zertteý áleýeti artady, otbasy institýtyna, sondai-aq jas daryndarǵa jan-jaqty qoldaý kórsetiletin bolady.
Óńirlerde jastarǵa berilgen sailaýaldy ýádelerdi oryndaýǵa kirisip ketti. Mysaly, Túrkistan oblysynda Jol kartasyna «Jasyl el» jobasy arqyly 6400 jasty jumysqa tartý, «Eńbek» baǵdarlamasy sheńberinde «Alǵashqy jumys orny» jobasy arqyly 1048 jasty jumysqa ornalastyrý jáne t.b. josparlar engizilgen.
Nur-Sultanda jyl saiyn páter satyp alýǵa 7 mlrd. teńge bólinetin «Elorda jastary» turǵyn úi baǵdarlamasy iske qosylady, al Almatyda «Almaty jastary» jobasy aiasynda 2025 jylǵa deiin turǵyn úi satyp alýǵa 5 myń jas otbasy nesie alady.
Aqmola oblysynda 2025 jylǵa deiin 2 700 oryndyq 7 stýdenttik jataqhananyń qurylysy aiaqtalady. Petropavlda 2021 jyly Jastar teatrynyń ashylýy josparlanýda.
Almaty oblysynda jastardyń jumyspen qamtylýyn arttyrý úshin óńirlik baǵdarlama jyl saiyn 2 myńǵa jýyq jasty jumys oryndarymen qamtamasyz etýge ýáde beredi.
Qostanai oblysynda buqaralyq sportty damytýǵa erekshe kóńil bólinedi. Máselen, 2025 jylǵa deiin baǵdarlamany iske asyrý sheńberinde oblystyń qalalary men aýdandarynda jasandy jabyny bar 30 shaǵyn fýtbol alańy, júzý basseini, 10 stritbol alańy, 12 strit-vorkaýt alańy, 29 hokkei korty salynatyn bolady.
Sonymen qatar, «Jastar – Otanǵa!» jastar kásipkerligin damytýǵa kóńil bólinýde. Máselen, Mańǵystaý oblysynda jyl saiyn 500 jas «Bastaý biznes» baǵdarlamasy boiynsha tegin bilim ala alady. Al Taraz qalasynda 2023 jyly «SMART» oqý ortalyǵyn ashý josparlanýda.
Esterińizge sala ketsek, maýsym aiynyń basynda partiianyń Saiasi keńesi Biýrosynyń sheshimimen «Jastar-Otanǵa!» baǵdarlamasyn iske asyrýǵa 2025 jylǵa deiin respýblikalyq Jol kartasy bekitildi. Ortalyqta jáne jergilikti jerlerde baǵdarlamanyń iske asyrylý barysyn Májilis pen máslihattardyń 616 jas depýtatynan turatyn jańadan qurylǵan Korpýs baqylaidy.
