ماسەلەن، الداعى بەس جىل ىشىندە 3،5 مىڭعا جۋىق ينديكاتورعا قول جەتكىزۋ، 35 جاسقا دەيىنگى 4،5 ميلليوننان استام جاس قازاقستاندىقتى قامتيتىن 6،5 مىڭ ءىس-شارانى ىسكە اسىرۋ جوسپارلانۋدا.
«جاستار-وتانعا!» باعدارلاماسى، جاستاردىڭ ءومىر ءسۇرۋ دەڭگەيى مەن الەۋمەتتىك جاعدايىن ارتتىرۋعا باعىتتالعان 5 باعىتتاعى جۇمىستى قامتيدى: ازاماتتىق بەلسەندىلىك، ساپالى ءبىلىم، جۇمىسپەن قامتۋ، قولجەتىمدى باسپانا جانە جاس وتباسىلاردى قولداۋ، تۇلعا رەتىندە دامۋ مەن بوس ۋاقىتتى ءتيىمدى وتكىزۋ.
اتاپ ايتقاندا، قالالىق جانە اۋىلدىق مەكتەپتەر اراسىنداعى ءبىلىم بەرۋ ساپاسىنداعى الشاقتىق قىسقارتىلادى، جاستاردىڭ عىلىمي-زەرتتەۋ الەۋەتى ارتادى، وتباسى ينستيتۋتىنا، سونداي-اق جاس دارىندارعا جان-جاقتى قولداۋ كورسەتىلەتىن بولادى.
وڭىرلەردە جاستارعا بەرىلگەن سايلاۋالدى ۋادەلەردى ورىنداۋعا كىرىسىپ كەتتى. مىسالى، تۇركىستان وبلىسىندا جول كارتاسىنا «جاسىل ەل» جوباسى ارقىلى 6400 جاستى جۇمىسقا تارتۋ، «ەڭبەك» باعدارلاماسى شەڭبەرىندە «العاشقى جۇمىس ورنى» جوباسى ارقىلى 1048 جاستى جۇمىسقا ورنالاستىرۋ جانە ت.ب. جوسپارلار ەنگىزىلگەن.
نۇر-سۇلتاندا جىل سايىن پاتەر ساتىپ الۋعا 7 ملرد. تەڭگە بولىنەتىن «ەلوردا جاستارى» تۇرعىن ءۇي باعدارلاماسى ىسكە قوسىلادى، ال الماتىدا «الماتى جاستارى» جوباسى اياسىندا 2025 جىلعا دەيىن تۇرعىن ءۇي ساتىپ الۋعا 5 مىڭ جاس وتباسى نەسيە الادى.
اقمولا وبلىسىندا 2025 جىلعا دەيىن 2 700 ورىندىق 7 ستۋدەنتتىك جاتاقحانانىڭ قۇرىلىسى اياقتالادى. پەتروپاۆلدا 2021 جىلى جاستار تەاترىنىڭ اشىلۋى جوسپارلانۋدا.
الماتى وبلىسىندا جاستاردىڭ جۇمىسپەن قامتىلۋىن ارتتىرۋ ءۇشىن وڭىرلىك باعدارلاما جىل سايىن 2 مىڭعا جۋىق جاستى جۇمىس ورىندارىمەن قامتاماسىز ەتۋگە ۋادە بەرەدى.
قوستاناي وبلىسىندا بۇقارالىق سپورتتى دامىتۋعا ەرەكشە كوڭىل بولىنەدى. ماسەلەن، 2025 جىلعا دەيىن باعدارلامانى ىسكە اسىرۋ شەڭبەرىندە وبلىستىڭ قالالارى مەن اۋداندارىندا جاساندى جابىنى بار 30 شاعىن فۋتبول الاڭى، ءجۇزۋ باسسەينى، 10 ستريتبول الاڭى، 12 ستريت-ۆوركاۋت الاڭى، 29 حوككەي كورتى سالىناتىن بولادى.
سونىمەن قاتار، «جاستار – وتانعا!» جاستار كاسىپكەرلىگىن دامىتۋعا كوڭىل بولىنۋدە. ماسەلەن، ماڭعىستاۋ وبلىسىندا جىل سايىن 500 جاس «باستاۋ بيزنەس» باعدارلاماسى بويىنشا تەگىن ءبىلىم الا الادى. ال تاراز قالاسىندا 2023 جىلى «SMART» وقۋ ورتالىعىن اشۋ جوسپارلانۋدا.
ەستەرىڭىزگە سالا كەتسەك، ماۋسىم ايىنىڭ باسىندا پارتيانىڭ ساياسي كەڭەسى بيۋروسىنىڭ شەشىمىمەن «جاستار-وتانعا!» باعدارلاماسىن ىسكە اسىرۋعا 2025 جىلعا دەيىن رەسپۋبليكالىق جول كارتاسى بەكىتىلدى. ورتالىقتا جانە جەرگىلىكتى جەرلەردە باعدارلامانىڭ ىسكە اسىرىلۋ بارىسىن ءماجىلىس پەن ءماسليحاتتاردىڭ 616 جاس دەپۋتاتىنان تۇراتىن جاڭادان قۇرىلعان كورپۋس باقىلايدى.
